- Саламянымі скульптурамі ўпрыгожылі Міншчыну да абласных дажынак, - тлумачыць вытокі крэатыву начальнік упраўлення культуры Мінскага аблвыканкама Анатоль Акушэвіч.
- Вызначыліся тут Мінскі і Слуцкі раёны. А Любань, дзе і прайшло 12 верасня абласное хлебаробскае свята, літаральна ўся была аздоблена "залатымі" выявамі з саломкі. Вырашылі выкарыстаць гэты вопыт і напярэдадні "Дажынак-2009", аздобіўшы саламянымі кампазіцыямі ўзбочыны дарогі да Брэстчыны. Ідэю падхапілі аддзелы культуры і ідэалогіі рэгіёнаў вобласці. У першую чаргу- Стаўбцоўскага і Нясвіжскага раёнаў. За справу ўзяліся не толькі дызайнеры, мастакі і саломкапляцельшчыкі, але і нашы самадзейныя калектывы ды майстры традыцыйных мастацтваў. Так шлях да Брэстчыны набыў незвычайнае саламяна-песеннае аздабленне...
Здымкі на першай і другой старонках нашайгазеты Юрый Іваноў зрабіў на палетках СВК "Агранёманскі" Стаўбцоўскага раёна. Натуральна, апрача саламяных дзівосаў, трапіў у кадр і народны хор "Нёман", што амаль 80 гадоў дзейнічае пры Старасвержанскім цэнтры культуры. Спяваў хор ля саламянай дзяўчыны - сімвалічнай захавальніцы хлебнага ўраджаю. Выпадковыя французы-вандроўнікі, што таксама трапілі ў палон прыдарожнай казкі, доўга не маглі зразумець, што за творчая акцыя на пленэры.
- Свята хлеба ў нас - рэспубліканскага кшталту,- патлумачыў ім начальнік аддзела культуры Стаўбцоўскага райвыканкама Анатоль Грэкаў,- таму дарога да Брэстчыны ў творчым плане - інтэрактыўная. Падключайцеся: слухайце, падпявайце, фатаграфуйцеся, купляйце сувеніры!
Я.Р.
Фота Юрыя ІВАНОВА
На здымку: народны хор "Нёман" Старасвержанскага цэнтра культуры ў прыдарожным саламяным антуражы.