“Водгукі песняў” Янкі Купалы
Ці ёсць мяжа для дасягненняў творцы? Узрост, калі можна “збіраць камяні”? І так, і не… Ва ўсякім разе народны мастак Беларусі Васіль Шаранговіч, нягледзячы на тое, што ўжо пераступіў 80-гадовую ўзроставую прыступку, не перастае здзіўляць гледача новымі творамі. Магчыма, таму што не ўспрымае паняцце школы як застылую догму, наадварот з узростам дае сабе свабоду творчага палёту. І дзе — у ілюстраванні паэм Янкі Купалы. Здавалася б, усё ужо сказана ім самім, і яго калегамі-мастакамі. “Адвечная песня”, “Яна і я”, “Курган” — літаграфіі Васіля Шаранговіча 1970-х сталі ўжо хрэстаматыйнымі. Але ў канцы 1990-х мастак зноў вярнуўся да ўлюбеных яму вобразаў, але ў новым, экспрэсіўным прачытанні, выкарыстоўваючы тэхніку гуашы і алоўка. Сёння цыкл з 17 новых работ выдатнага беларускага графіка экспануецца ў Дзяржаўным літаратурным музеі Янкі Купалы.