Эпапея за эпапеяй. Калі ж канец?
Мары, на жаль, не заўсёды спраўджваюцца наяве. Дасюль памятаю, як па маім прыходзе ў газету, у студзені 2009 года, рэдакцыя распачала новы праект “Родная зямля: час крэатыву”. Першая публікацыя названага цыкла рэдактара аддзела “К” Яўгена Рагіна мела загаловак “У сваім доме ды без Дома культуры?” і распавядала пра гаротны стан Глускага РДК, прызнанага яшчэ тады аварыйным. Другая публікацыя, ужо пад маім прозвішчам, “Як завяршыць рамонтную эпапею ў Крупках?”, паведамляла пра цяжкасці ў тамтэйшых бібліятэкараў: галоўная раённая “кніжніца” вымушана была “кватараваць” у адным будынку з дзіцячай раённай бібліятэкай. Таксама меліся праблемы з рамонтам мясцовага РДК.