- "Гарады-героі" - першы вопыт у жанры, якому і не адразу дасі вызначэнне, - распавёў пра падрабязнасці тэлевізійнай "кухні" рэжысёр тэлебачання спецыяльных праектаў Ілья БАРАНАЎ, - На першы погляд, гэта дакументальны серыял, з добрай графікай, з цікавымі вядучымі. Згоду на ўдзел у "Гарадах..." далі такія вядомыя акцёры, як Уладзімір Гасцюхін, Ігар Сігоў. Пагадзіцеся, гэта вялікая ўдача. Наша здымачная група пабывала ва ўсіх гарадах-героях. З іншага боку, у праекце прысутнічаюць пастановачныя эпізоды, дзе падзеі разглядаюцца з мастацкага пункта гледжання. І серыял ператвараецца ў дакументальна-пастановачны фільм.
- Што было самым складаным пад час рэалізацыі праекта?
- Самым складаным было - знайсці залатую сярэдзіну паміж сухімі фактамі, што даюць разнастайныя даведнікі, і эмоцыямі ветэранаў, відавочцаў, якіх, на жаль, становіцца з кожным годам усё менш... Напрыклад, адзін з ветэранаў, абаронцаў Севастопаля, узгадваў, што яго атрад адбіваў нямецкую танкавую атаку, якая налічвала каля пяцісот "Тыграў". Вядома, столькі бранятэхнікі на тым участку фронту быць не магло, але самае галоўнае - чалавек змагаўся, не ўцякаў, не хаваўся, ваяваў на смерць. Мне падаецца, для перадачы эмацыйнага стану чалавека, які знаходзіўся ў баі, не так важна колькі там было гармат, самалётаў...
Складаная была і серыя пра Ленінград. Вельмі перажывалі, ці атрымаецца перадаць стан блакаднікаў. Дзякуй усім гэтым людзям за іх адкрытыя, часам вельмі цяжкія ўспаміны, бо часта яны былі звязаны са смерцю блізкіх...
- У цэлым, наколькі цяжка рэканструяваць гістарычныя падзеі?
- Рэканструкцыю гістарычных падзей можна параўнаць, напэўна, з працай майстроў-рэстаўратараў, што аднаўляюць каштоўнасці мінулага. І калі пэўны фрагмент беззваротна страчаны, яны мусяць вырашыць, якім жа ён быў. На жаль, многія з нас ведаюць толькі агульнавядомыя факты, што не перадаюць усіх жахаў вайны. Мы ж шчыра імкнуліся даследаваць "падводную частку айсберга", каб адказаць на пытанне: "За што гарады атрымлівалі статус герояў?".
На здымку: Ілья Баранаў і Канстанцін Рабкоў пад час здымак у Кіеве.
Фота ont.by