Паводле Дзяржаўнай праграмы "Культура Беларусі" прадоўжыцца і традыцыя правядзення Дзён культуры нашай краіны за мяжой, а таксама фестываляў, конкурсаў, выставак, канферэнцый, пад час якіх будзе адбывацца цеснае супрацоўніцтва з дыяспарай.
Апошні яскравы прыклад у гэтым напрамку: Дні культуры нашай краіны ва Украіне. Як адзначыў у размове з карэспандэнтам "К" першы намеснік міністра культуры Рэспублікі Беларусь Уладзімір Карачэўскі, у святочных мерапрыемствах прымалі ўдзел нашы суайчыннікі з разнастайных рэгіёнаў Украіны. Яны былі ў захапленні ад выступленняў беларускіх калектываў, асабліва - Нацыянальнага акадэмічнага народнага аркестра Рэспублікі Беларусь імя І.Жыновіча. Для дыяспары такія мерапрыемствы даюць яшчэ і магчымасць абмеркаваць свае надзённыя клопаты на высокім узроўні. У прыватнасці, у Пасольстве Беларусі ў Кіеве першы намеснік міністра культуры сустрэўся з нашымі суайчыннікамі ва Украіне, пазнаёміў іх з сучаснай сітуацыяй у сферы культуры, планамі Міністэрства, у тым ліку па супрацоўніцтве з дыяспарай.
Па словах Уладзіміра Карачэўскага, размова атрымалася вельмі плённай і цікавай. Сярод іншага, была агучана прапанова адзначыць у наступным годзе юбілей Максіма Багдановіча на месцы яго пахавання ў Ялце.
Да таго ж, нашы суайчыннікі маюць жаданне ўдзельнічаць ва ўсіх акцыях, што будзе праводзіць Беларусь, яны з задавальненнем распавядаюць іншым пра культуру нашай краіны. У сувязі з гэтым прагучала просьба пасадзейнічаць у набыцці метадычнай і мастацкай літаратуры, сцэнарыяў народных святаў, дапамагчы інструментамі і касцюмамі. Вельмі хвалююць дыяспару і стаўленне моладзі да сваіх каранёў, праблема падтрымкі сувязі з гістарычнай Радзімай.
Цяпер усе прапановы будуць абагульняцца. Як адзначыў Уладзімір Карачэўскі, у дадзеным кірунку трэба праводзіць канкрэтную працу, пры гэтым павінна быць менш агульных слоў. Такім чынам, пасля дапрацоўкі прапаноў распачнецца праца па іх рэалізацыі.
Тым больш, сваю падтрымку выказалі і прадстаўнікі Міністэрства культуры і турызму Украіны. Яны запэўнілі, што стануць таксама аказваць беларускай дыяспары неабходную дапамогу, у тым ліку - выдзяляць сродкі на правядзенне фестываляў. Неабходную дапамогу беларусам замежжа, у тым ліку ва Украіне, аказвае Рэспубліканскі цэнтр нацыянальных культур. Па словах яго дырэктара Ірыны Лемцюговай, паступова адбываецца забеспячэнне музычных калектываў беларусаў замежжа сцэнічнымі строямі ў нацыянальным стылі. Рэгулярнай стала і перадача дыяспары кніг з мастацкай і метадычнай літаратурай, прытым, што заявак на кніжную прадукцыю ад замежных арганізацый вельмі шмат.
Але ці не галоўным клопатам для Рэспубліканскага цэнтра нацыянальных культур стане падрыхтоўка да маштабнага І Фестывалю мастацтваў беларусаў свету. Як адзначыла Ірына Лемцюгова, установай ужо распрацавана палажэнне ўнікальнага форуму, які мусіць адбыцца летам наступнага года і збярэ больш за 300 удзельнікаў.
Фота Юрыя ІВАНОВА