Гарэзяць юныя артысты ансамбля “Аношкі” з Нясвіжчыны. |
Гэта было вельмі прыгожае і кранальнае дзейства. Каб пасадзіць самых маленькіх удзельнікаў конкурсу за фартэпіяна — сямігадовых юных музыкантаў з падрыхтоўчых аддзяленняў, — выкладчыкам даводзілася падкладваць ім пад ногі падстаўкі і “нарошчваць” крэслы. Аднак таленавітым навучэнцам пад сілу было выканаць па памяці п’есы Баха і Моцарта. Дэманстрацыя такой сілы волі і вялікай працы пры наяўнасці музычнага дару выклікала захапленне залы.
Майстэрства юных выканаўцаў ацэньвала журы ў складзе выкладчыкаў Мінскага вучылішча мастацтваў і Баранавіцкага музычнага вучылішча. Узначаліў журы член Саюза кампазітараў Беларусі Алег Чыркун. У складзе журы быў і яшчэ адзін кампазітар, выкладчык Баранавіцкага музычнага вучылішча Уладзімір Грушэўскі, які пасля конкурснага праслухоўвання паказаў майстар-клас.
Гран-пры конкурсу прысуджаны ансамблю народных інструментаў Мастоўскай дзіцячай музычнай школы Гродзенскай вобласці і ансамблю скрыпачоў Заслаўскай школы мастацтваў. Лепшыя выканаўцы, якія сталі пераможцамі і прызёрамі, узнагароджаны дыпломамі і падарункамі, аб якіх паклапаціўся аддзел культуры Стаўбцоўскага райвыканкама.
Творчы конкурс закончыўся гала-канцэртам у гарадскім Доме культуры. У ім прынялі ўдзел лаўрэаты і прызёры ХVІІІ Стаўбцоўскага рэгіянальнага фестывалю юных музыкантаў.
Святлана ЖЫБУЛЬ
Стоўбцы
Фота Васіля ЗЯНЬКО