У экспазіцыі мяне заінтрыгавала карціна «Гумно», якую вы час ад часу паўтараеце. Сюжэт яе звязаны з мясцінамі вашага дзяцінства — мястэчкам Купа...
— Купа яшчэ існуе?
Так, і я нават перыядычна там бываю, цяпер гэта гарадскі пасёлак Нарач, выглядае — скажам так — нерамантычна. Гледзячы на гэтую карціну, у мяне адразу ўзнікла асацыяцыя з Маркам Шагалам, які, прыехаўшы ў СССР, не захацеў наведаць свой горад Віцебск, каб не расчароўвацца... Таму што з сённяшняй рэчаіснасцю ваш вобраз не мае нічога агульнага. Гэта вашы родныя мясціны?
— Не, там ніхто ў мяне не жыў. Але кожным летам у дзяцінстве мы здымалі ў Купе дачу. Там было тры дамы беларускіх пісьменнікаў — Максіма Танка, Аркадзя Куляшова і Міхася Лынькова... Дык вось, Куляшоў параіў нашай сям’і гэтую вёску. Мясціны былі абсалютна дзікія, акрамя трох гэтых дамоў былі толькі сем двароў у Купе. І ўсё — вакол лес і возера Нарач.
«Гумно» — гэта нейкае месца памяці? Прайшло столькі гадоў, а вы ўсё яго пішаце. Што гэта за вобраз?
— Гэта метафізічны вобраз... Натуральна, я вандрую па гэтых мясцінах. У думках...
Гэта такое прустаўскае бісквітнае пячэнне, са смаку якога «выцягваюцца» ўспаміны з далёкага мінулага...
— Так, вельмі падобна. Асацыятыўна так і ёсць... Прыемныя вандроўкі па дзяцінстве, у гэтых вандроўках усё захавалася з неверагоднай дакладнасцю. Да паху... Феномен гэты вядомы. Уласцівасць памяці: калі чалавек згадвае нешта яркае ў сваім жыцці, ён перажывае гэта наноў, яно працягвае жыць толькі ва ўспамінах. І тое вельмі цікава — перажываць адну і тую ж падзею, аднак не кожны на гэта здольны...
Ну добра, гумно гумном, што яшчэ вы хочаце ў мяне спытаць?
Пераезд. У мяне была ў жыцці сітуацыя, калі я змяніла прозвішча і пачала пражываць нейкае іншае жыццё...
— Гэта не пра тое...
Але вось гэты пераезд у Парыж — гэта ж таксама спроба пачаць усё спачатку, адкінуць усё, што было да гэтага, каб рабіць нешта іншае. Былі вось раней Мінск, Піцер, Масква, потым зноў вяртаецеся ў Мінск.
— Гэта не спроба, а факт.
Так, але інфармацыі зусім ніякай, і вы фактычна з’язджалі, не ведаючы куды. Ці нешта ведалі?
— Безумоўна, я не мог ведаць, куды я еду. Толькі рамантычны вобраз Парыжа існаваў у свядомасці.
Што вы шукалі і што пакідалі?
— Я ехаў у Парыж, які я ведаў з літаратуры.
І не знайшлі яго тут...
— Я магу сказаць, што я заспеў апошні вагон, які адыходзіў. Паспеў зазірнуць. Бо сёння і ў паміне няма таго Парыжа, што я застаў. А той, да якога імкнуўся, сышоў у небыццё, у міфалогію, той Парыж пачатку ХХ стагоддзя, што прыцягваў таленавітых людзей з усяго свету, як магніт. Яны тут вельмі ўтульна сябе адчувалі. Нічога падобнага не захавалася, а цэнтр перамясціўся ў іншае месца. Куды?
Распыліўся...
— Цэнтра, такога прывабнага, які быў тут у пачатку ХХ стагоддзя, безумоўна, няма.
Вы адчулі расчараванне, калі прыехалі?
— Канешне, але паўтараю: я ўсё ж ускочыў у апошні вагон.
І што вы засталі?
— Яшчэ былі сляды таго, што я шукаў, — цікавае мастацтва, некалькі старых шансанье, якія яшчэ спявалі. Кіно было прыстойнае, а цяпер тут як усюды — страчаны ўласны твар...
Вы засталі сляды сапраўднай парыжскай атмасферы?
— Я шукаў не сляды, хацеў убачыць сваімі вачыма і ўвайсці ў гэтае жыццё.
Не спрабавалі ці не марылі пасяліцца ў Вуллі? Там дагэтуль ёсць дзейныя майстэрні...
— А навошта? У мяне тут свой вулей. Гэтую майстэрню я знайшоў у першыя паўтара года пасля пераезду. Зараз яна цалкам перабудаваная, але знаходзіцца на тым жа самым месцы. Дагэтуль тут быў звычайны французскі правінцыйны дамок, сённяшняму выгляду толькі пяць гадоў.
Лепш раскажыце, што ў Мінску адбываецца.
Ці даўно вы там былі?
— У 2010 годзе.
То-бок толькі падчас сваёй выставы ў Нацыянальным мастацкім музеі... У Мінску ўсе няблага, нармальны еўрапейскі горад. Архітэктура псуецца, грамадства, наадварот, мяняецца ў лепшы бок.
— Мінск быў самым несапсаваным горадам на тэрыторыі былой Расійскай імперыі. Мы ўнікальныя па сваім геаграфічным становішчы — буферная краіна паміж Захадам і Расіяй.
Стагоддзямі фармаваўся нацыянальны характар, з улікам таго, што Беларусь не жыла ніколі па сваіх правілах.
Гэта не ўнікальнасць, а рок. Ваша новая карціна на мальберце... Я памятаю гэтага персанажа з мінскай выставы, там гэтую дзяўчыну вы змясцілі ў куб. Вы зусім па-іншаму сталі вырашаць жывапісную прастору.
— Вы засталі вельмі спецыфічную работу — гэта прысвячэнне майму любімаму мастаку эпохі Адраджэння П’еру дэ ля Франчэска. Пазаўчора, дарэчы, я стаў акадэмікам Фларэнційскай акадэміі прыгожых мастацтваў. Для мяне гэта вельмі знакавая падзея, бо акадэмія — самая старая ў Еўропе. І вось якраз я пішу гэты твор. Цікавае супадзенне...
Шчырыя віншаванні! Вы расказвалі, што, ад’язджаючы з Мінска ў Парыж, захапілі з сабой стос фотаздымкаў — і яны дапамаглі знайсці метад, стыль і прыём. На здымках былі чужыя, не знаёмыя вам людзі?
— Гэта была мая калекцыя, фотаздымкаў было няшмат, і так — гэта былі чужыя людзі, мне не знаёмыя.
А для вас важна, калі вы пачынаеце работу, заснаваную на фотаздымку, што ваш галоўны персанаж — не знаёмы вам чалавек з незразумелым бэкграўндам? Важна для таго, каб вы расказалі сваю ўласную гісторыю.
— Знаёмыя мяне мала цікавяць у сэнсе аб’ектаў для карціны. Незнаёмыя хвалююць больш, таму што я павінен здагадвацца і прыдумляць ім жыццё.
Яны дапамагаюць знайсці сюжэт?
— Вельмі дапамагаюць. Гэта цэлая гісторыя, апісаная ва ўсіх падрабязнасцях у кнізе, якая неўзабаве выйдзе.
Вам прапаноўвалі выкладаць у Парыжскай акадэміі мастацтваў...
— Я адмовіўся, бо, па-першае, гэта не мая прафесія. Па-другое, тое, што адбываецца ва ўсіх навучальных установах, мне непрыемна: яны адмовіліся ад праграмы акадэмічнай адукацыі, якой шмат стагоддзяў. Працуюць прафесары, якія алоўка ў руках не трымалі. Драматычны парадокс: у Расіі па прычыне яе адсталасці захаваліся высокапрафесійныя педагогі. А тут адукацыя проста непісьменная.
Вашых сяброў больш у Францыі ці ў Беларусі?
— У Беларусі больш нікога няма, маё пакаленне вымерла. Цікава іншае, што, калі я быў у Мінску пасля дзесяці першых год адсутнасці, мы сабраліся ў той жа кватэры, за тым жа сталом, за якім мяне праводзілі. І там былі ўсе, акрамя Алеся Адамовіча. Рыгор Барадулін, Навум Кіслік, Валя Тарас... Не стану пералічваць... Дванаццаць блізкіх людзей. У 2010-м, калі прыехаў на сваю мінскую выставу, амаль усе яны былі жывыя. Сёння нікога ўжо з іх няма. Таму ў гэтым сэнсе з Беларуссю ўсё скончана — для мяне. А ў Маскве засталіся сябры, але гэтыя сябры з’явіліся пазней і з’яўляюцца сёння. Новыя і новыя, усе маладзейшыя за мяне.
Вы часта ездзіце ў Расію?
— Нічога падобнага, надзвычай рэдка. Яны часта прыязджаюць.
А з Беларусі рэдка?
— Там, як я сказаў, няма блізкіх маіх сяброў, але людзі адтуль прыязджаюць, як вы зараз. Адносна рэдка ў параўнанні з рускімі, да таго ж у Расіі шмат мастакоў, з якімі мне цікава. Калі была мая выстава ў Фларэнцыі, нікога не было з Беларусі, але з Масквы шмат народу прыехала. 70 віншаванняў адтуль атрымаў з прысваеннем звання акадэміка. Мая жонка мне прачытала, бо я Інтэрнэтам не карыстаюся.
Чаму?
— Не хачу траціць на гэта час і сілы, жонка шукае інфармацыю. Аднак гэта грандыёзна: назіраць за тым, як змяняецца свет.
Вы некалі казалі, што гульні з галерэямі разбуральныя для мастака.
— Што такое галерэя? Гэта камерцыйная арганізацыя. Больш развітыя і магутныя з іх ствараюць бачнасць арганізмаў, якія вядуць, выхоўваюць мастака, вызначаюць тэндэнцыі. Але ў гэтую гульню граюць адзінкі, а ў асноўным гэта адкрыта камерцыйная крама, якая падтрымлівае тое, што прадаецца на рынку. Таму не залежаць ад галерэй — велізарны прывілей.
У вас атрымалася?
— У мяне, дзякуй богу, атрымалася. Але ў пачатку шляху тое было проста немагчыма, таму гэта быў фарт, што я адразу патрапіў у харошую галерэю. Нібы ракетаносьбіт, яна мяне выкінула на нейкі прыстойны ўзровень.
Як адбываюцца ў вас стасункі з пакупнікамі сёння — без галерэй?
— У мяне ёсць група верных калекцыянераў. Дзякуючы ім я працую без пасярэднікаў.
Можна сказаць, што вырашэнне пытання, як дасягнуць свабоды творчасці, — гэта прыбраць пасярэдніка?
— Чаму, пасярэднікі вельмі карысныя. Асабліва калі гэта чалавек, які мае адукацыю, сувязі, цэніць мастацтва — як гэта было ў пачатку ХХ стагоддзя, такія людзі называліся курцье. Персоны, якія любілі мастака, ездзілі па свеце, прапагандавалі яго творчасць. Але асобныя людзі не могуць супернічаць з добра арганізаванай камерцыйнай вытворчасцю. Аднак цяпер галерэі ў сваю чаргу і заканамерна сталі ахвярамі аўкцыёнаў. Бо гэта яшчэ лепш арганізаваная камерцыйная структура, чым галерэя. Калі спачатку аўкцыёны арыентаваліся на самыя буйныя галерэі ў свеце, то цяпер ужо галерэі прыстройваюцца, глядзяць, што на рынку прадаецца, і найбольш паспяховых творцаў імкнуцца завабіць у галерэю. Гібельная сістэма для чалавека, які хоча стаць незалежным мастаком. Як будзе далей — невядома.
То-бок рэцэпту незалежнасці ў вас няма?
— Няма. Тое, што галерэі знікнуць, — гэта зразумела. Яны ўжо закрываюцца пачкамі, бачу гэта ў сваім горадзе. Магчыма, наступнае пакаленне будзе прадаваць свае творы праз Інтэрнэт. Дый ужо зараз з’явіліся такія мастакі.
Так, і пасрэднік тут непатрэбны, але важна ж выстраіць ацэнкавую іерархію — хто чым каштоўны.
— Іерархіі ўсталёўваюцца вельмі проста — рынкам.
Коштам.
— І няма нічога больш няпэўнага, чым кошт.
Вы па-ранейшаму займаецеся скульптурай, гляджу, што ў вас у майстэрні стаяць аб’екты...
— Апошнія гады ўжо не займаюся, няма фізічных сіл.
Усё ж вяртаючыся да пачатку нашай гутаркі, ніякіх духоўных нітачак з радзімай не засталося? Толькі ўспаміны?
— Жывых кантактаў не засталося. Бывае, узнікае жаданне паехаць у лясы беларускія ў грыбы... З’яўляецца і прападае. А іншых прычын няма, каб прыехаць.
Вас прасілі прыняць расійскае грамадзянства, але вы адмовіліся, з радзімы ж такіх прапаноў не паступала, аднак у суцяшэнне магу сказаць, што зараз лёгка можна прыляцець па бязвізе. Ужо няма такіх ранейшых цяжкасцей з прыездам у Беларусь. Але ў Купу ўсё ж не трэба ехаць, дзе вы такое гумно знайшлі...
— Я яго прыдумаў. Але вы хочаце сказаць, што гумнаў больш няма ў Беларусі?
Ёсць.
— У Купе мы любілі лазіць на гарышча, а там быў велізарны стос даваенных газет і часопісаў — на польскай мове. І там мы знайшлі часопіс «Нарач», разгарнулі, і я абалдзеў!
Парасоны з карункаў...
— Не толькі парасоны. Яхты! Па набярэжнай шпацыруюць жанчыны ў капялюшыках, сукенкі да зямлі. Ніякіх прыкмет гэтай цывілізацыі мы не засталі. Таму пытанне ўзнікала ўмомант: куды ж усе гэтыя людзі падзеліся? Як яны жылі? Адкуль прыязджалі?
З Вільні, напрыклад. Нарач лічылася папулярным курортам, вузкакалейка была пракладзена.
— Цэлая цывілізацыя была. Потым ужо мы, дзеці, згадвалі, рэйкі непадалёк, рэшткі паравоза. А Ціхан, гаспадар, у якога мы здымалі дом, казаў, што ён гэта ўсё сваімі вачамі бачыў да вайны. Гэта ўсё знікла ўмомант, цалкам. Ніякіх слядоў. Глухое месца.
А ўяўляеце, каб усе гэтыя пласты ў Беларусі не знішчаліся, а наслойваліся, як у Парыжы. Гэта маё самае моцнае ўражанне ад горада — культурны палімпсест, новае, што ўзнікае, пачынае жыць поруч, не знішчаючы старое. Нават, улічваючы зачысткі барона Асмана, гэтыя шматкультурныя пласты выглядаюць для нас даволі экзатычна.
— Ну, калі б... Добра, што краіна захавалася. Мы неяк размаўлялі з першым нашым паслом Нінай Мазай пра будучыню Беларусі. Я казаў, што мы маем унікальнае геаграфічнае становішча, на памежжы. Трэба зрабіць Беларусь такой Швейцарыяй, банкаўскай краінай. Швейцарыяй для ўсіх постсавецкіх рэспублік...