Здавалася, паказы суправаджалі нейкія асаблівыя гледачы з абвостраным пачуццём тэатральнай праўды. Вельмі патрабавальныя. Збольшага інтэлектуальныя, абазнаныя, яны былі вельмі шчырымі ў сваім суперажыванні. Настолькі, што адраблялі нароўні з артыстамі. Бо не прапускалі ні зваротаў, ні пасланняў. Бо так успрымалі сцэнічныя метафары, так рэагавалі, ажно, здаецца, пашыралі і паглыблялі іх; яны не толькі ведалі альбо адчувалі кантэкст — яны проста ля тэатральнага парога яго стваралі! Што трагедыйны, што рамантычны. А вербацім тэатра «Актор» дык цалкам з іх спісаны, абсалютна — разам з тамтэйшым гераічным сабакам. А яшчэ — з беларусам, які не жартам лічыць Кіеў асяродкам існай свабоды (асабістай, грамадзянскай) ды вучыцца з ёю жыць, патрабуючы ад сябе адпаведнага стаўлення да людзей і абставін — па самых высокіх рахунках.
Напраўду, з каго складаецца славутая сталічная размаітасць? Хто і адкуль усе гэтыя «Каханыя людзі, якія неяк так гавораць»? Яны збіраюцца на сцэне дзякуючы рэжысёрцы Таццяне Губрый (мастацкі кіраўнік пастаноўкі — вядомы Стас Жыркоў), не замахваюцца на дослед у чалавеказнаўстве, але ўяўляюць з сябе пэўны зрэз сацыяльных слаёў: сучаснікаў-суайчыннікаў, сведкаў альбо творцаў найноўшай гісторыі, якіх увасабляюць «артысткі на адну ролю» — выканаўцы-аматаркі. «Каб распавесці вам пра вас», тры месяцы яны, добраахвотніцы, распытвалі людзей на вуліцах. Падчас паказу ці не за кожную хтосьці заўзее-перажывае — сваякі, знаёмцы, знаёмыя знаёмых ствараюць выключную атмасферу асабістай зацікаўленасці ды паразумення, прытым што дзяўчаты працуюць дыхтоўна, кожная даносіць праз тэкст лёс рэальнага чалавека і патрапляе накрэсліць ягоны вобраз. Пасіянарыі і маргіналы, каханыя людзі гавораць пра сябе, усведамляючы, што жывуць у славутую часіну пераменаў, ад якой так засцерагае ўсходняя мудрасць...
Пра падобных — людзей эпохі злому — у Нацыянальным тэатры імя Івана Франко ставіў Шэкспіравага «Рычарда ІІІ» рэжысёр Аўтандзіл Варсімашвілі (Тбілісі, Грузія) з Багданам Бенюком у галоўнай ролі. Радзіна, службоўцы, паплечнікі караля — дасціпныя, дасведчаныя, жорсткія, спанатраныя ў імкненні й дзеянні, спрактыкаваныя ў звадах і падступнасці. Іх здольнасці развітыя, характары загартаваныя. Яны выходзяць на сцэну навучанымі і налаўчонымі, аднак ад пачатку нечым ледзь улоўна нагадваюць трагедыйны хор — і робяцца ім, і гэты ахвярны хор гіне дашчэнту. Іх можна параўнаць таксама з ансамблем салістаў, дзе кожны ўмее і падначальвацца, і падначальваць, дасягаючы асабістае мэты, але траекторыя так і закручваецца ў петлі, што прагнуць высакароднай шыі.
«Рычард ІІІ» не зачэпіць асаблівай эстэтыкай альбо трактоўкай, хоць праз ягоных выканаўцаў лёгка ўгледзець сучасныя палітычныя алюзіі (бо двор жа каралеўскі). Уражвае іншая акалічнасць: рэжысёр распачынае гаворку пра грамадства, якое спраўна гартуе ды вылучае з сябе найздатнейшых (і гэта не значыць — найлепшых). Матывуе іх пасоўвацца наверх. Нашто? А каб тыя, дзякуючы сваім вартасцям і якасцям, самазбэсціліся ды самазнішчыліся. Пакуль так. І гучыць гэта як прысуд.
Выдатны артыст Багдан Бянюк падкрэслівае заганную амбітнасць атачэння свайго персанажа: спачатку Рычарда ніхто не ўспрымае сур’ёзна, а потым кожны мяркуе, што ўжо яго аніякая трасца не зачэпіць, маўляў, да яго кароль ставіцца... асабліва, не так, як да ўсіх. І ўжо ён, разумнік, пэўна перагуляе, здужае, адолее недарэку на троне. Ён жа, кароль, не вялікіх здольнасцяў, гэта ж усе бачаць!.. Бачаць. І таму вокамгненна размяжоўваюцца па інтарэсах, дбаючы кожны пра сваё. Выдае, што пра самагубства.
Паблажлівасць, паважлівасць, асцярожную стрыманасць, шчырае каханне, таварыскасць — Рычард, як малатарня, саб’е на горкі яблык усе пачуцці і цноты, усмешліва заахвоціць памылкі агульныя і асабістыя: у спектаклі Варсімашвілі ён перадусім... артыст-маніпулятар, гэткі суччын сын. Хочаце — блазен. Хочаце — на вачах зменіць амплуа, пусціць слязіну альбо маляўніча абапрэцца на меч (ён цягае гэты меч, пазначку гвалту і грубай сілы, як кульбу — да скону), згадае дзяцінства, пакліча маму... і зашморгне вяроўчынай старэчую шыю герцагіні Ёркскай. Так бы мовіць, наладзіць імправізацыю. Нават Бэкінгем, а выканаўца ролі Аляксей Багдановіч не прамінае падкрэсліць ягоныя інтэлект ды праніклівасць, купляецца на раз.
Аднойчы — на тым свеце? — замардаваныя збяруцца і з’явяцца да караля прывідным шыхтам, напалохаюць, прыціснуць, але... рэжысёр не дае ім ходу ў другую дзею спектакля, спыняе шэраг асацыяцый, усё адно як пакідае злачынцу без страху пакуты і помсты.
Прагу падпарадкаваць ды разбураць Рычард цягне з сабою з дзяцінства, пра гэта сведчыць сцэнограф Міроні Швялідзэ, ствараючы для караля досыць дзіўны палацавы комплекс — на манер своеасаблівай дзіцячай пляцоўкі для гульняў. Мажліва, тое, што здавалася велічным і прыўкрасным дзіцяці, цяпер абражае каралеўскую сталасць, таму даводзіцца да занядбання: майно прынцыпова не даглядаецца, парахнее, дзярэцца. Як Нерон колісь забаўляўся з Рымам, Рычард Багдана Бенюка бавіцца пляцыкам, палацыкам, вежачкаю, вязнічкаю... Скрыні, наладаваныя падабенствам старых цацак, у другой дзеі робяцца скрынямі-трунамі, якія за адным разам ператвараюцца і ў камеры для ўвязненых, і ў велізарны агульны стол. Уладкаваўшыся за ім, грамада быццам жарэ самую сябе. Залівае прадчуванні алкаголем. Ці ж любіць Рычард хоць каго так, як гэта сцвярджае? Ды ўсіх запар! Як рыбіну. Ці мяса.
Тутсама, пры стале, праз нястрыманасць ды падазронасць, ярчэй заўважныя адзнакі збачэнняў, адхіленняў, звыроджанняў. Нейкай асаблівай мазахісцкай здаволенасці ахвярнага хору. Ды што там — вар’яцтва. Неспадзявана і жудліва — жаночага, агульнага для бальшыні прысутных кабет. Таму, напрыклад, не дзівіць, не абурае пераўтварэнне Лэдзі Ганны ў каханку пачварнага караля, і чым больш пяшчотнай клапатлівасці выяўляе гераіня Таццяны Шляхавай, тым больш ненармальнасці праменіць, тым хутчэй набліжаецца да свайго жыццёвага фіналу. Зрэшты, як і Рычард, над якім таксама ўзвысяцца постаці забойцы ды наглядчыка турмы — самых запатрабаваных прафесійнікаў дзяржавы.
Ад трагічнага да смешнага — крок. А калі адважыцца на некалькі крокаў? Раптам можна дайсці і да шчасця? Толькі прайсці іх трэба асаблівым чынам, як артысты Новага драматычнага тэатра на Пячэрску: «Salida cruzada — 8 крокаў танга». Восем персанажаў спектакля рэжысёркі Алены Лазовіч, мілых закаханых розных узростаў, танцавальны рытм падхопліваў і некаторы час настойліва вёў: праз авалоданне майстэрствам танга яны вучыліся разумецца з уласным жыццём і хоць як ім кіраваць, пераглядалі свае сацыяльныя ролі, асэнсоўвалі падпарадкаванасць і незалежнасць...
Пары гуртаваліся вакол студыйнага настаўніка ва ўвасабленні Руслана Сакольніка (разам з Ліліяй Нагорнай ён ставіў і выконваў танцавальныя нумары) — перасякаліся, пераборліва перамешваліся, далікатна дэманстравалі, наколькі няўлоўна й нябачна людзі залежаць адно ад аднаго: драматургія ў пэўным сэнсе спраўджвала «эфект матыля», хоць ёй і бракавала падзейнай абвостранасці. Але нечаканасць палягала ў тым, што тэкст і сюжэтныя павароткі артысты распрацоўвалі калектыўна. Магчыма, гэткім чынам адгукаліся на пазасцэнічныя цяжкасці (прыкладам, тэатр працяглы час рамантавалі) і таму справядліва аберагалі ад важкіх непрыемнасцяў хоць бы сваіх персанажаў, то-бок студыю танга тыя ўспрымалі як месца, недасяжнае для магутных жыццёвых скрутаў, як пэўную псіхалагічную дапамогу, як адпачынак для душы. Там на некаторы час яны рабіліся артыстамі, што праз восем базавых крокаў стырнавалі да непаўторнага, асаблівага, асабістага танца, ён іх змяняў і кшталціў...
Мабыць, людзі з глядзельні на зломе часу ўсведамляюць нешта велічнае і няўхільнае — наступ гістарычных падзей, не менш. Асабістае быццам мізарнее і губляе значнасць. Верагодна, якраз тэатр патрапляе аднавіць для чалавека адчуванне важкасці ўласнага жыцця.