Графічнае мастацтва цесна звязана з гісторыяй кнігі, а першыя гравюры, ад якіх адлічваюць развіццё беларускай друкаванай графікі, з’явіліся менавіта ў кнігах Францыска Скарыны.
Ініцыятар пленэру Ларыса Лысенка, кіраўніца Мастацкай галерэі Нацыянальнага Полацкага гісторыка-культурнага музея-запаведніка, заўважыла, што горад выклікаў у майстроў нечаканыя ўражанні: «За час знаходжання тут аўтары змаглі стварыць вельмі глыбокія, неадназначныя па трактоўцы аркушы, напоўненыя складанымі сэнсамі. У кожнай гравюры прысутнічаюць фрагменты тых славутасцяў, якія эмацыйна і па-філасофску паспрыялі асэнсаванню гістарычнага мінулага, прымусілі разважаць пра вечнасць і пра тое, як чалавек адчувае сябе ў адносінах да яе. Полацк у працах мастакоў паўстаў як горад, дзе ўвасобіўся час. Дзевяць імёнаў, дзевяць розных асоб, дзевяць бачанняў аднаго места».
Аркушы, зробленыя на працягу гэтых дзесяці дзён, папоўнілі калекцыю «Полацк у творах сучасных мастакоў», якая збіраецца для фондаў Нацыянальнага полацкага гісторыка-культурнага музея-запаведніка, дзе ўжо маецца шмат экзэмпляраў станковай і друкаванай графікі. Дарэчы, летась для папаўнення збору твораў праводзіўся жывапісны пленэр і працы таксама засталіся ў горадзе.
Падчас пленэру працавала выстава беларускай графікі — больш за сто работ васямнаццаці аўтараў знаёмілі з разнастайнымі відамі і тэхнікамі эстампа. Па выніках адкрылася яшчэ адна экспазіцыя — «Пад знакам Скарыны».
Для таго каб стварыць удзельнікам адпаведны настрой і плённую атмасферу, была арганізавана вялікая культурніцкая праграма. Пачалі са знаёмства з Мастацкай галерэяй, з яе багатай, унікальнай калекцыяй, што збіралася на працягу многіх гадоў, а ХХ стагоддзе — адно з самых рэпрэзентатыўных у краіне. На другі дзень мастакоў чакаў канцэрт арганнай музыкі ў Сафійскім саборы і экскурсія па храме. Найбольш уразілі Спаса-Еўфрасіннеўскі манастыр і знаёмства з фрэскамі ХІІ стагоддзя Спаскага храма. Экскурсію вяла прафесійная рэстаўратарка Дар’я Скапцова, яна расказала пра іканаграфічную праграму роспісаў і падрабязнасці рэстаўрацыі. Знаёмства з храмам знайшло ўвасабленне ў работах графікаў, якія, дарэчы, заўважылі: горад валодае асаблівай энергетыкай, што спрыяе творчасці і няспешнаму сузіранню.
Працавалі ўсе разам — у вялікім памяшканні, у майстэрні, дзе кожнаму быў выдзелены асобны стол. Удзельнікаў было дзевяць — Андрэй Басалыга, Уладзімір Савіч, Вольга Нікішына, Павел Амялюсік, Тамара Шэлест, Андрэй Якубаў, Сафія Піскун, Марыя Дарожка і Эвалдас Мікалаўскіс (Літва). Кожны з іх прысвяціў твор гораду, адметна перапрацаваўшы свае ўражанні.
Абрысы архітэктурных будынкаў ці ледзь улоўныя сляды гісторыі, гульня святла і ценю пад скляпеннямі храма ці загадкавыя абліччы фрэсак, у нейкіх творах — відавочна, у нейкіх — лёгкім намёкам, вобраз горада з яго багатым бэкграўндам паўставаў у кожным аркушы. І не спатрэбілася натурных накідаў, графіка — мастацтва інтэлектуальнае, тэхналагічна абумоўленае, механізм з’яўлення вобразаў на плоскасці аркуша залежыць як ад досведу і інтуіцыі творцы, так і ад наяўнасці свежых імпульсаў, пастаноўкі новых задач. Аўтараў, прывязаных да інструментаў на сваім стале, да друкарскага станка і складанага тэхналагічнага працэсу, запрасілі папрацаваць у «палявых» выязных умовах, і вынік атрымаўся годны. Нехта ўзбагаціўся новымі прыёмамі, а арганізатары атрымалі работы з арыгінальным аўтарскім бачаннем.
Час раскладаецца на сёння і ўчора ў лічбавым калажы Паўла Амялюсіка «Час», дзе вецер гісторыі «злоўлены» дакладнымі прыёмамі — праз ракурс і палімпсест. Тамара Шэлест у складаным па структуры графічным аркушы «Фота на памяць» разважае над паняццем вобраза і яго інтэрпрэтацыяй, над увасабленнямі сімвалічных і нематэрыяльных рэчаў, звязаных з хадой гісторыі. Сафія Піскун разглядае горад з розных кропак, адлюстроўваючы гістарычныя фактуры праз оптыку сённяшняга чалавека. Вольгу Нікішыну ўразілі напаўраскрытыя фрэскі розных стагоддзяў. Тры лікі як тры ўвасабленні, што паступова раствараюцца ў гістарычным забыцці, застаюцца толькі слядамі ў сучаснай свядомасці… У афорце «Дні і ночы» Андрэй Басалыга праз антрапаморфныя постаці нібы пазначае механізмы фармавання чалавечага вобраза розных эпох, даследуючы хутчэй не гатовыя выявы, а сам працэс іх афармлення.
Тэхнікі выканання — афорт, лінагравюра і лічбавы друк. Афортны станок, на якім друкаваліся творы, быў размешчаны ў музеі беларускага кнігадрукавання — прылада і сучасная і, як высветлілася, працоўная.
Унікальнасць гэтага праекта яшчэ і ў тым, што гледачы маглі ўбачыць сам працэс творчасці, які звычайна адбываецца за зачыненымі дзвярыма.
Першага верасня, у Дзень ведаў, вучні Полацкай сярэдняй школы №1 наведалі Мастацкую галерэю, каб паўдзельнічаць у майстар-класе па стварэнні гравюры — у тэхніках лінагравюры і ксілаграфіі. На дзве гатовыя друкарскія формы дзеці выціскалі фарбу, а пасля пераносілі малюнак на паперу. Атрымлівалі адбіткі, якія можна было забраць з сабой. Працэс настолькі захапіў іх, што многія захацелі стаць мастакамі.
Пэўныя тэхнічныя складанасці (аддаленасць месца працы ад месца друку, неабходнасць прывозіць з сабой патрэбныя матэрыялы) не надта заміналі ўдзельнікам пленэру, аднак у арганізатаркі Ларысы Лысенка з’явілася новыя мара: зрабіць базу — графічную майстэрню, каб ладзіць падобныя імпрэзы рэгулярна, а ў старшыні секцыі графікі Саюза мастакоў Андрэя Басалыгі паўстала жаданне арганізаваць літаграфскі пленэр у Мінску — на базе майстэрні мастацкага камбіната. Узровень развіцця графічнага мастацтва ў нас дастаткова высокі, каб Беларусь стала адным з цэнтраў прыцягнення аўтараў з усяго свету.