Ірына, што вас натхніла ў новай краіне, як пераезд паўплываў на вашы творчыя прыхільнасці?
— Я вельмі хацела вучыцца наноў, спазнаваць новыя матэрыялы і тэхнікі. Для гэтага былі ўсе ўмовы!
Да творчасці мяне натхняла літаральна ўсё — людзі, велізарная колькасць выстаў, музеяў і канцэртаў у Стакгольме. Я паступіла ў тамтэйшую акадэмію мастацтваў, спачатку на паасобныя курсы, якія мяне цікавілі, а пасля на майстар-праграму, дзе мы — пяць студэнтаў пад кіраўніцтвам двух прафесараў — распрацоўвалі кожны свой праект.
Паступова я стала заўважаць, што пераходжу ў іншыя сферы мастацтва і імкліва набліжаюся да раней недасяжнай скульптуры, разглядаючы яе як малую архітэктурную форму ў навакольным асяроддзі.
Што наконт афіцыйнага прызнання — членства ў творчым саюзе, удзелу ў выставах... Як хутка гэта адбылося?
— Мяне прынялі ў Саюз мастакоў Швецыі ў год пераезду. Працэдура аказалася незвычайна простай: усе, у каго ёсць міжнародныя праекты, выставы і звязаная з мастацтвам адукацыя, падаюць заяўку і прымаюцца на пасяджэнні камітэта без прысутнасці саміх мастакоў. Я проста атрымала пацверджанне і членскі білет па пошце. Асноўная задача Саюза — гэта абарона, у тым ліку юрыдычная, сваіх сяброў. Вядома, ён арганізоўвае для мастакоў розныя сустрэчы, дыскусіі, курсы для вырашэння пытанняў аплаты і ўмоў працы. Любая праява ініцыятывы на карысць Саюза вельмі заахвочваецца.
Якія вашы апошнія праекты і дасягненні?
— Калі ўзяць апошнія тры гады маёй творчасці, то можна сказаць, што я працую над адной і той жа ідэяй, падыходзячы да яе з розных пунктаў гледжання і выкарыстоўваючы розныя метады.
Так, напрыклад, у 2013-м я ініцыявала і кіравала міжнароднай выставай-праектам «Голас жанчыны ў мастацтве» сумесна з Цэнтрам сучаснага мастацтва ў Мінску і шведскімі аўтаркамі. Прадстаўляла сваю творчасць на міжнародным праекце «ACT+ISM», гэта Цэнтр сучаснага мастацтва ў Токіа, выступіла арганізатаркай Тэкстыльнага праекта ў Стамбуле, прыняла ўдзел у Інтэрнацыянальным тэкстыльным біенале ў Бельгіі ў 2015-м.
У 2015—2016 скончыла курсы: «Канкурэнцыя ў мастацтве і архітэктуры», «Публічнае мастацтва ў грамадскім асяроддзі», «Мастацкае даследаванне», «Ліццё з бронзы». Акрамя таго, я працягваю другі год навучання на майстар-праграме па тэме «Візуальная культура».
Як увогуле жывецца мастаку ў Швецыі, наколькі дзяржава ўдзельнічае ў арганізацыі арт-жыцця? Ці ёсць нейкая мясцовая спецыфіка ў дзейнасці музеяў і галерэй?
— Мастак у Швецыі адчувае сябе даволі ўпэўненым і абароненым разнастайнымі дзяржаўнымі арганізацыямі. Усё залежыць ад яго ініцыятывы: ніхто не будзе прыходзіць і настойліва прапаноўваць павялічыць эфектыўнасць працы, але пры жаданні такая магчымасць ёсць. Існуе мноства праграм, у тым ліку міжнародных, накіраваных на падтрымку творцы. Гэта адказнасць самой асобы — выкарыстоўваць ці не наяўныя рэсурсы. Ёсць аўтары, што падпісваюць кантракт з галерэяй, якая прадае працы і прадстаўляе інтарэсы мастака на розных выставах, але і бярэ вялікі адсотак прыбытку (часта 50%) за свае паслугі.
Шведскія галерэі і музеі вельмі зацікаўлены ў пошуку новых нестандартных аўтараў. У нейкім сэнсе, мастак у Швецыі належыць да такой своеасаблівай элітнай касты, сям’і, дзе ўсе ўсіх ведаюць і часта перасякаюцца, выстаўляюцца разам. Існуе шмат выстаў, на якіх ты маеш магчымасць пра сябе заявіць з умовай, што кампетэнтнае журы прызнае тваю творчасць цікавай. Імпануе адкрытасць і сумленнасць працы мастацкага журы, члены якога ніколі не змешваюць асабістыя і агульныя інтарэсы.
А ўвогуле мастацтва тут часта становіцца прыбытковым бізнэсам для тых, хто ім прафесійна займаецца.
Вы працавалі ў прыватнай школе ў Швецыі, а шведская школа сёння выклікае ва ўсіх велізарную цікавасць, бо нестандартныя падыходы да працэсу навучання прыводзяць да вельмі парадаксальных вынікаў. Як там выкладаюць мастацтва дзецям?
— Пра шведскую сістэму адукацыі я магу гаварыць гадзінамі. У першы ж год майго знаходжання ў гэтай краіне мяне запрасілі выкладаць мастацтва для дзяцей, якія мелі да гэтага прадмета адмысловую цікаўнасць. Лекцыі па мастацтве вельмі адкрытыя. Дзеці самі падзяляюцца на групы, ёсць 4-5-6 праектаў, вучні выконваюць іх на працягу года. У школе ўсе прадметы змешваюцца паміж сабой, таму выкладчык па мастацтве можа супрацоўнічаць з выкладчыкамі, напрыклад, па хіміі, геаграфіі, і дзеці працуюць над адным для ўсіх трох прадметаў праектам. На ўроку мастацтва працуюць над яго мастацкай часткай. Гэта можа быць фільм, які вучань сам здымае, мантуе, агучвае сумесна са сваімі аднакласнікамі. Тэхнічнае абсталяванне школ, як і дзіцячых садкоў, перавышае ўсе чаканні.
З сістэмай шведскай школы мне давялося цесна сутыкнуцца з самага першага дня, бо я прыехала з двума сынамі. Іх школьная сістэма пастаянна ўдасканальваецца! Шведы вельмі жадаюць захаваць баланс паміж шчырай цікавасцю дзяцей і абавязковым узроўнем ведаў, неабходным для паступлення ва ўніверсітэты іншых еўрапейскіх краін. Аднак! Ніхто нікога нічога не прымушае рабіць! Дзіця само вырашае, што яму цікава, а што не. З гэтым адразу ж паўсталі праблемы ў майго малодшага сына, бо яму было 9 гадоў і ён паспеў крыху ўвабраць у сябе нашу абавязковую сістэму, чакаючы, што ён атрымае заданні, а выканаўшы іх, заслужыць адзнаку. «Не!!! Мы будзем чакаць столькі, колькі трэба, пакуль ваш сын сам не прыйдзе да рашэння, што яму цікава і якім чынам ён жадае вучыцца», — пачула я ў школе.
Так стымулюецца асабістая адказнасць з акцэнтам на праблему. Адным з любімых і важных прадметаў для дзяцей з’яўляецца матэматыка, выкладанне якой вельмі адрозніваецца ад нашага. Найперш важнае развіццё логікі, ты павінен аргументаваць і даказаць іншым, што твой ход думак правільны. Ад тваіх аргументаў залежыць вынік. Гэтая якасць спатрэбіцца дзецям у дарослым жыцці.
Дзеці вельмі часта робяць прэзентацыі па розных прадметах, прычым матэрыял яны павінны накапаць самі. Як у вучня ў цябе ёсць магчымасць узяць інтэрв’ю ў караля, калі тваё школьнае заданне гэтага патрабуе. Усе арганізацыі і прыватныя людзі паставяцца з вялікай павагай і выдаткуюць столькі часу, колькі патрэбна, калі дзіця звернецца з праблемай, якую ён вырашае ў рамках хатняга задання!
Гэтая краіна ўвогуле вельмі адказна ставіцца да кожнага дзіцяці.
Як вы прыйшлі да свайго скульптурнага метаду?
— Я пачала шлях у мастацтве з габелена і не перарывала гэтую «чырвоную нітку», выяўляючыся ў іншых тэхніках. У працах імкнуся захаваць цеплыню тэкстылю нашых бабуль, якія так хацелі стварыць утульнасць і дабрабыт у хаце. Менавіта таму я ўрэшце звярнулася да ўстойлівага і цяжкага матэрыялу — у надзеі перадаць мяккую, гнуткую нітку і тканіну. Я раблю «вязаныя» гаплікам бронзавыя і бетонныя работы.
Для мяне важна, каб фактура паверхні мела такое ж значэнне, як ідэя ці сілуэт.
Калі я бываю на розных міжнародным выставах, заўсёды назіраю, куды рухаецца сёння скульптура, якія матэрыялы выкарыстоўваюцца, якія патрабаванні актуальныя. Дынаміка ліній і форм, дастаткова абстрактная трактоўка з магчымасцямі для гледача прыняць удзел і сфармаваць свае асацыяцыі — вось тыя нешматлікія прынцыпы, чым кіруюцца мастакі для стварэння аб’екта ў навакольным асяроддзі. А ён будзе знаходзіцца ў дыялогу з сотнямі людзей, што будуць праходзіць паўз яго.
Сваімі скульптурамі я расказваю гісторыі, выказваю меркаванне адносна працэсаў, якія адбываюцца сёння і ўплываюць на заўтрашні дзень...
Вы працуеце з целам. Ці займаліся адмыслова гендарнымі даследаваннямі? Ці ваш падыход інтуітыўны? Што для вас жаночае ў мастацтве?
— Гендарнае пытанне цікавіла мяне заўсёды. Я вырасла сярод вайскоўцаў, а гэта, як правіла, мужчыны. Я ўвабрала ў сябе мужчынскі пункт гледжання на розныя пытанні. Калі паступіла на мастацка-графічны факультэт у Віцебску, там таксама, у 1988 годзе, было не вельмі шмат дзяўчат. Я прывыкла, што на чале дзяржавы, у якой я была выгадавана, стаяць мужчыны і апошняе вырашальнае слова — за імі.
Воляю лёсу я апынулася ў краіне, змешчанай у першай пяцёрцы па размеркаванні сіл з гендарнай пазіцыі — як у эшалонах улады, так і ў іншых месцах. У шведаў прынята законам 50/50 — жанчын і мужчын — і крый божа гэты закон каму-небудзь парушыць. Вывучаючы скульптуру адначасова са спецыфікай шведскай дзяржавы, мне ўсё больш хацелася прыдумаць свой унікальны, жаночы почырк! Я хацела напісаць вялікімі літарамі: я — жанчына, якая стварае жаночыя скульптуры, можа быць, часам незразумелыя і правакацыйныя для ўладных мужчын!
Што сёння скульптура? Дзе яе межы? Як ваша скульптура ўзаемадзейнічае са сваім асяроддзем?
— Сучасная скульптура — гэта ўжо не толькі вершнік на кані ці, скажам, велізарная постаць магутнай жанчыны, адна нага якой пераўзыходзіць таўшчыню ўсёй мяне... Сённяшняя скульптура не мае межаў, і адным з найважнейшых яе прынцыпаў з’яўляецца ўцягванне людзей і прасторы ў працэс стварэння. Сённяшняя скульптура адлюстроўвае наш час! Час імгненна змяняецца, ён вызначаецца татальнай перавагай тэхнікі ва ўсіх сферах нашага жыцця. Такім чынам, хуткасць, дынаміка, інфарматызацыя.
Ці можа асяроддзе выцягнуць дрэнную ці загубіць добрую працу?
— Натуральна, яно вельмі ўплывае на ўспрыманне твора! Скульптура можа загінуць, знікнуць праз дамінуючае і непасоўнае атачэнне.
Аднак я не згодна з паняццямі кепскай ці добрай працы. Хто тут вырашае? З гісторыі мы ведаем мноства прыкладаў пасмяротнага прызнання вялікіх мастакоў, бо гэта наша прафесія: ісці наперадзе часу! Мы павінны і жадаем прыдумляць новыя, няісныя раней стылі і формы і, натуральна, чалавеку, які не разумее ідэі мастака, самым простым падаецца сказаць, што гэта дрэнна.
А як тэхнічна адбываецца працэс стварэння? Вашы работы бываюць вялікіх памераў. Ці не падыходзілі вы да думкі, або, можа, вам казалі: не, гэта не жаночая праца.
— Я дастаткова доўга жыву ў Швецыі, і ў мяне няма такіх комплексаў. Я — чалавек, і мне цікава выпрабоўваць межы. Дзе яны?
У працэсе працы я выкарыстоўваю самыя розныя матэрыялы, часта гэта рэшткі папярэдніх эксперыментаў, што дзіўным чынам яднаюцца ў адно цэлае. Часам я, сама таго не ведаючы, працавала над часткамі адной скульптуры, якія пасля плаўна перацякалі ў адно, утвараючы нешта, што натхняла мяне. І праца доўжылася.
Як вашы работы нараджаюцца — з вонкавай ці ўнутранай запатрабаванасці? З замоў? Ці яны зазвычай — «хатнія нарыхтоўкі», якія вы потым прапануеце на нейкія праекты...
— Падчас стварэння ўдзельнічаюць усе рэцэптары, уся асоба цалкам, ты знаходзішся ва ўключаным стане, як лакатар, таму натхненне можа прыйсці і пасля аб’явы пра мастацкі конкурс, і без думкі пра будучую рэалізацыю. Я працавала таксама над аб’ектамі для, напрыклад, новай школы ці лякарні, бо гэта вельмі тут тыпова: задумваць удзел мастака яшчэ на стадыі планавання, а яго меркаванне з’яўляецца адным з вызначальных.
А ўвогуле крыніца натхнення для мяне — вялікія жанчыны-скульптары, творцы з сусветным імем, што здолелі заняць сваё годнае месца ў гісторыі. Напрыклад, Ева Хэсэ, нямецка-амерыканская мастачка з вельмі няпростым лёсам, блізкая мне па манеры і працэсу працы. Вельмі рэфлексоўная, адпраўны пункт работы Хэсэ— матэрыял. Як кажуць пра яе сябры: «Яна ніколі не пераставала гуляць з матэрыялам», і для мяне гэта таксама важна ў творчасці. Часта мае працы натхнёныя менавіта спецыфічнымі асаблівасцямі матэрыялу. У гэтым я салідарная з яшчэ адной вялікай мастачкай нашага часу — Луіз Буржуа, якая адважна і шмат эксперыментавала, пакінуўшы пасля сябе мноства цудоўных ідэй на тэму жанчыны і мацярынства. Як і Барбара Хэпворт... Усім гэтым вартым захаплення асобам, на вялікі жаль, давялося адмовіцца ад сямейнага шчасця, ад магчымасці мець дзяцей, іх мужчыны не вытрымлівалі таго факту, што гэтыя жанчыны былі замужам за сваёй творчасцю. Я ж удзячная лёсу: змагла выхаваць цудоўных хлопцаў, якім сёння 22 і 17 гадоў. Адзін з іх — будучы архітэктар, і сучаснае мастацтва вельмі ўплывае на яго погляды на архітэктуру.
Што вы лічыце сваім асаблівым поспехам, сваім адкрыццём? Якія новыя магчымасці дала вам новая тэхніка?
— Для любога мастака асаблівым поспехам лічыцца стварэнне сваёй, не падобнага ні да якой іншай мовы выражэння. Калі людзі, што бачылі мае скульптуры ўсяго адзін раз, пазнаюць мой стыль. Ура! Я зрабіла гэта! Я знайшла свой почырк...
Больш за ўсё мяне натхняе магчымасць перадачы мяккага, тактыльнага ў халодным і манументальным. Два такія дыяметральна процілеглыя матэрыялы сустракаюцца і зліваюцца разам у маіх скульптурах! Мяне натхняе думка, што немагчымае магчыма. Я апантана веру: мае скульптуры адкрыюць новыя магчымасці для бетону. У Швецыі ёсць інстытут бетону, калі я да іх прыйшла і распавяла сваю ідэю, яны шчыра пасмяяліся, сказаўшы, маўляў, нічога не выйдзе. Аднак зацікавіліся і прапанавалі свае назапашаныя досведам хітрасці для ўтаймавання наравістага бетону, які патрабуе дакладнага тэхналагічнага падыходу. Па грамах вымяраць суадносіны. Не! Гэта не для мяне! Я ламала і буду ламаць межы! Толькі маё ўяўленне можа камандаваць маімі дзеяннямі. Я нарадзілася ў кашулі, не маючы магчымасці дыхаць, і, разарваўшы мяжу паміж сабой і асяроддзем, раблю гэта заўжды. Не! Я гатовая да новых паваротаў у маёй творчасці, бо мой мозг шукае натхнення паўсюль і заўсёды. Я люблю жыццё і вельмі жадаю данесці людзям, што нашы будзённыя гісторыі таксама вартыя стаць скульптурай, якая будзе стаяць на плошчы нароўні з помнікамі знакамітым асобам.