Здавалася б, што прасцей: збяры «зорных» студэнтаў, якія ў бягучым навучальным годзе займалі прызавыя месцы на конкурсах, і пахваліся імі. Але кожны праект мае індывідуальную ідэю. У 2012 годзе з бляскам выступілі кансерваторскія аркестры, узмоцненыя для выканання «Паэмы экстазу» Аляксандра Скрабіна старэйшымі калегамі — Акадэмічным сімфанічным аркестрам Рэспублікі Беларусь. Летась на сцэне ўладарыў «кароль інструментаў» — раяль, а лепшыя піяністы двух пакаленняў выконвалі шэдэўры фартэпіяннай класікі — Чайкоўскага, Ліста, Мусаргскага. Цяперашняя праграма была амаль цалкам новая, без чаканых «хітоў» і правераных «бісоў», без класічнай падборкі акадэмічных інструментаў «раяль — скрыпка — віяланчэль». Але кожны нумар, бы тая разынка ў смачным печыве, апынуўся на сваім месцы і сведчыў пра дасягненні пэўнай галіны вышэйшай музычнай адукацыі краіны.
У канцэрце шмат што здарылася ўпершыню. Так, упершыню ў праграму быў уключаны гітарны аркестр Акадэміі пад кіраўніцтвам прафесара Валерыя Жывалеўскага. Класічная гітара — адна з «каронных» спецыяльнасцей, што выкладаюцца ў Акадэміі музыкі, навучацца якой едуць да нашых знаных педагогаў юнакі і дзяўчаты з розных краін свету. Колькасць навучэнцаў (а калісьці быў усяго адзін чалавек на курсе!) дазволіла стварыць унікальны аркестравы калектыў, што за паўтара года існавання ўжо займеў арыгінальны рэпертуар, любоў слухачоў і вядомасць у Беларусі. Музыка для гітарнага аркестра асаблівая — элегантная, вытанчаная, акварэльная, як і фарбы прадстаўленай п’есы Леа Браўэра «Пейзаж з дажджом».
Упершыню ў праграму «Вечара кансерваторыі» ўвайшоў харэаграфічны нумар. Далёка не ўсе ведаюць, што ўжо больш за 20 год у нашай Акадэміі музыкі ажыццяўляецца падрыхтоўка балетмайстраў і балетных педагогаў, якія набываюць вышэйшую адукацыю, а сярод вядомых выпускнікоў кафедры харэаграфіі можна назваць балетмайстра Раду Паклітару, вучня Валянціна Елізар’ева. Таму для часткі гледачоў густоўны сольны нумар у выкананні студэнткі Таццяны Падабедавай у пастаноўцы Юліі Мельнічук, таксама студэнткі, стаў прыемным сюрпрызам.
Традыцыйна ярка выступілі моцныя калектывы з вялікім канцэртным і гастрольным вопытам — ансамбль трубачоў «Інтрада» пад кіраўніцтвам прафесара Мікалая Волкава і ансамбль цымбалістаў «Лілея», які ўзначальвае прафесар Яўген Гладкоў. Калектывы, створаныя са сціплай вучэбнай мэтай, за гады свайго існавання (дарэчы, «Лілея» сёлета адзначыла 50-годдзе) сталі паўнавартаснымі ўдзельнікамі музычнага жыцця Беларусі. Склад выканаўцаў штогод мяняецца, адпаведна як мяняецца студэнцкі кантынгент, але высокая планка прафесійнага майстэрства, зададзеная педагогамі, знакамітымі на ўсёй прасторы СНД, вытрымліваецца бездакорна.
Сольнае майстэрства прадэманстравалі лаўрэаты міжнародных конкурсаў баяніст Сяргей Бутар і піяністка Ульяна Скробава (яны выканалі віртуозныя «Варыяцыі на тэму Паганіні» Вітальда Лютаслаўскага), а таксама марымбіст Антон Лазоўскі і саксафаніст Мікіта Пятроў. Дарэчы, апошні дуэт таксама адлюстроўвае пэўныя змены ў тэндэнцыях акадэмічнай музыкі, а менавіта грандыёзны рост цікавасці да ўдарных інструментаў, што выявілася ў сусветнай «партытуры» міжнародных конкурсаў і фестываляў, у стварэнні новага рэпертуарнага пласта ў працы сучасных кампазітараў.
Фінальным пунктам канцэрта стала выступленне Студэнцкага хору Акадэміі пад кіраўніцтвам Інесы Бадзяка. Упершыню з філарманічнай сцэны быў прадстаўлены новы твор беларускага кампазітара і харавога дырыжора Андрэя Саўрыцкага «Меса ў джазавым настроі». Нязвыклае для нашага менталітэту (так бы мовіць, экуменістычнае) прачытанне духоўнага жанру было выканана ў светлых фарбах і патрабавала ад хору чыстага інтанавання складаных шматгучных гармоній. Лепшыя якасці — маладосць і крэатыўнасць — хор прадэманстраваў, сышоўшы са станкоў і пераўтварыўшыся ў артыстаў «Вестсайдскай гісторыі» Леанарда Бернстайна.
Ідэю канцэрта абагульніла ў заключным слове рэктарка Акадэміі Кацярына Дулава: класічная музыка — гэта не сумна. Гэта музыка маладосці, якая зноў і зноў адкрывае новым слухачам новыя тэмы, вобразы, гучанні.