Адным з першых мерапрыемстваў юбілейнага ХХХ Міжнароднага фестывалю мастацтваў “Славянскі базар у Віцебску” стала адкрыццё памятнай мемарыяльнай дошкі аднаму з заснавальнікаў гэтага буйнога форуму і яго першаму дырэктару Радзівону Басу.

У сёмы раз на “Славянскім базары ў Віцебску”, пачынаючы з 2014 года, ладзіцца праект “Лялечны квартал”. Ён збірае не толькі дзіцячыя, але і сур’ёзныя дарослыя спектаклі тэатраў лялек з розных краін, застаючыся адным з самых інтэлектуальных асяродкаў летняга фестывалю, і дадаткова дэманструе сінтэз мастацтваў, заяўлены як адна з эстэтычных платформ гэтага буйнога форуму.

Акурат сёння а 15-й гадзіне на “Славянскім базары ў Віцебску” адкрываецца ХІХ Міжнародны дзіцячы конкурс “Віцебск-2021”. Папярэдне, як заўжды, адбылося лёсаванне, дзеці паспелі пазнаёміцца. Сёння — першы дзень спаборніцтва, калі трэба праспяваць нацыянальны рэпертуар, а менавіта песню кампазітара краіны і на мове краіны, якую прадстаўляе той ці іншы ўдзельнік. Заўтра — другі конкурсны дзень з вольным рэпертуарам, а літаральна праз гадзіну пасля завяршэння праслухоўванняў — цырымонія ўзнагароджвання і гала-канцэрт.