 |
Карына Фрэдрыксан з выхаванцам Багушэўскага дома-інтэрната для дзяцей з асаблівасцямі псіхафізічнага развіцця. |
Як жа часта, праходзячы каля высокіх платоў падобных інтэрнатаў, мы паскараем крок, каб хутчэй забыць, хто там, за гэтым плотам. Аднак “нязручныя” для некаторых дзеці не толькі існуюць, але і займаюцца творчасцю. Яны спяваюць, танцуюць, малююць, хай і не так умела, як іх “здаровыя” аднагодкі, але з той жа непаўторнай шчырасцю і бляскам у вачах.
Гэта даўно зразумелі шведы. Яны нярэдка наведваюць малых жыхароў беларускіх інтэрнатаў. Пасля падобных міжнародных сустрэч і нарадзілася ідэя кампакт-дыска “Ты— унікальны”, які павінен падарыць радасць ад зносін з дзецьмі. На студыі гуказапісу Шведскага радыё пры дапамозе Стакгольмскага канцэртнага аркестра шведская аўтарка тэксту і музыкі, прафесійны працаўнік па доглядзе за разумова адсталымі дзецьмі Карына Фрэдрыксан і беларускія вакалісткі Ірына Бакаева і Вера Неўдах стварылі неверагодна пяшчотны альбом. Ужо назвы кампазіцый гавораць самі за сябе: “Ты любімы”, “Ты адзін такі”, “Ты такі слаўны”.
— Часам можа здавацца, што канструктыўныя зносіны з такімі дзецьмі немагчымыя, — гаворыць у прадмове да выдання Карына Фрэдрыксан. — Аднак вядома, што калі дзіця не можа выказаць сябе вербальна, у яго паляпшаецца праца іншых органаў пачуццяў, напрыклад, чуццё, а таксама фізічнае і разумовае ўспрыманне. Вось чаму песня, музыка, дотык — гэта ідэальны спосаб наблізіцца да дзіцяці, спосаб мяккіх і паважлівых зносін з ім.
— Мае 25 гадоў працы са здаровымі і хворымі дзецьмі, а таксама з дарослымі паказваюць, што музыка — гэта унікальны інструмент для зносін, які здольны вызваліць утоеныя рэсурсы арганізма. На гэта, у нейкай ступені, і накіраваны гэты музычны альбом, — дадала выкладчык музыкі, музычны тэрапеўт Ліс Якабсан.
Дыск стаў галоўным падарункам на Рэспубліканскім фестывалі юных талентаў — выхаванцаў спецыялізаваных дзіцячых дамоў і школ-інтэрнатаў “Мары спраўджваюцца”, які праводзіла Беларускае дабрачыннае аб’яднанне “Свет без межаў” на чале з Таццянай Іванаўнай Паеўскай пры падтрымцы прадстаўнікоў дабрачынных грамадскіх аб’яднанняў Швецыі і Польшчы.
Свой чарговы візіт Карына Фрэдрыксан і Ганна-Марыя Хасэлгрэнхал — актыўныя памочніцы “Свету без межаў” па ажыццяўленні Міжнароднага праекта “Альтэрнатыўныя формы і метады працы з дзецьмі з асаблівасцямі псіхафізічнага развіцця” — прымеркавалі да Міжнароднага дня інвалідаў. Цэлы тыдзень шведкі правялі ў Багушэўскім доме-інтэрнаце, наведалі рэдакцыю газеты для дзяцей і падлеткаў “Зорька”, былі ў Епархіі, удзельнічалі ў дзіцячых дабрачынных акцыях у сталіцы. Дай Бог, каб такія акцыі не толькі палепшылі паразуменне паміж дарослымі і малечай, але і хоць крышачку змянілі стаўленне да дзяцей з псіхафізічнымі адхіленнямі нашых здаровых дарослых людзей.
Настасся ПАНКРАТАВА
Фота Дзмітрыя ЕЛІСЕЕВА
