Віцебск. Лістапад 1919 года. Вялікая аўдыторыя Віцебскай народнай мастацкай вучэльні поўная навучэнцаў, сярод іх таксама відаць і нямала выкладчыкаў. Усе з нецярплівасцю чакаюць лектара. І вось ён уваходзіць — на выгляд гадоў сарака, невялікага росту, мажнага целаскладу. Гэта Казімір Малевіч — знакаміты мастак, вядомы стваральнік новага напрамку ў абстрактным жывапісе “супрэматызму”, аўтар нашумелага “Чорнага квадрата”.