Дзень помнікаў. Для людзей
Што тут душой крывіць: многія важныя святы праходзяць нібы незаўважна, становячыся нагодай хіба для фармальных мерапрыемстваў, якія ніяк не закранаюць грамадскасць. Такі самы незайздросны лёс цалкам мог бы спасцігнуць і Міжнародны дзень аховы помнікаў і гістарычных мясцін, які прыпадае на 18 красавіка. Але... сама грамадскасць — а дакладней, ініцыятыўная яе частка — прыклала намаганні, каб гэтага не адбылося. У выніку, з нядаўняга часу маем адметныя традыцыі свята: правядзенне Фэсту экскурсаводаў і суботнікаў на аб’ектах гісторыка-культурнай спадчыны, адзін з якіх зладзіў і калектыў рэдакцыі “К”. Прычым абедзве гэтыя завядзёнкі — менавіта наша, беларускае “ноу-хау”. У суседзяў падобнай актыўнасці пакуль не назіраецца.