“Летапіс” асабістай зоны
Хаця студыя “Летапіс” даўно не з’яўляецца адзіным месцам у нашай краіне, дзе займаюцца неігравым кіно, само паняцце “кінадакументалістыка” і сёння звязваецца з гэтым знакамітым падраздзяленнем “Беларусьфільма”. Цягам мінулага года яго супрацоўнікі стварылі 24 стужкі, многія з якіх сапраўды маюць права на ўвагу шырокай аўдыторыі. Большая частка новай прадукцыі “Летапісу” — фільмы-партрэты нашых сучаснікаў і выбітных дзеячаў мінулага. Засяроджанне на асобе — прыкмета аўтарскага почырку цяперашняга “Летапісу”, якая не можа застацца па-за ўвагай.