У сусветны джаз — з беларускімі цымбаламі
Міхась ЛЯВОНЧЫК — адзіны ў свеце (!) музыкант, які “джазуе” на беларускіх цымбалах. І сольна, і ў ансамблі з братам-піяністам, і ў складзе групы “Талісман”, дзе, акрамя яго, ёсць скрыпач-украінец, акардэаніст-малдаванін і ўдарнік-немец. Але справа не толькі ў гэтым. Міша, ва ўсіх сэнсах, — Музыкант з вялікай літары. Што яшчэ раз пацвердзіў ІІ Міжнародны конкурс выканаўцаў на народных інструментах імя І.Жыновіча, які завяршыўся ў Мінску 9-га красавіка. Міша быў уганараваны першай прэміяй. Па праўдзе ж кажучы, гэта быў Гран-пры. Нават не Гран-пры (на жаль, умовамі гэтага конкурсу Гран-пры не прадугледжаны, і каб усё ж такі надаць прэміі большую вагу, журы не прысудзіла сярод цымбалістаў “срэбра”, падзяліўшы “бронзу” на траіх), а нейкі звышконкурсны ўзровень, спаборнічаць з якім марна. Справа не толькі ў фенаменальнай тэхніцы ці ў тым, што ў сваю конкурсную праграму выканаўца ўключыў уласныя джазавыя творы, сярод якіх была і поўная настальгіі Імправізацыя на тэму знакамітай “Перапёлачкі”. Феномен М.Лявончыка — у дзівосным, недасягальным, ужо паводле прыроды нашых цымбалаў, спалучэнні трапяткіх, быццам “матыльковых”, імпрэсіянісцкіх гучанняў з жорсткімі, амаль “рокавымі”. Гэта не цымбалы! І не джаз. Гэта нейкая лявончыкавіяна”.
Далей