Успамін пра лета яшчэ доўга будзе грэць душу. Як для мяне, дык самым “гарачым” уражаннем стаў фестываль жывой музыкі “Камянецкі Драйв”, які ладзіцца ўжо пяты год. І што паказальна, маладзёжны праект ініцыяваў і рэалізаваў аддзел ідэалагічнай работы, культуры і па справах моладзі Камянецкага райвыканкама на чале з Мікалаем Громікам. Інакш кажучы, нашым аддзелам, як бы яны ні скардзіліся на фінансавую нішчымніцу, — усё па плячы. Было б жаданне. А яно ёсць. Таму праект ажыццяўляецца за пазабюджэтны кошт. Сярод спонсараў — дзяржаўныя і прыватныя арганізацыі. Па словах Мікалая Громіка, на ўдзел у сёлетнім “…Драйве” было пададзена каля 200 заявак з Беларусі, Расіі, Польшчы. Цягам двух дзён у гарадскім парку выступіла два дзясяткі музычных калектываў. Набярыце ў пошукавіку “Камянецкі Драйв”, паслухайце, як гучыць рок (у тым ліку — і беларускамоўны) ля Белавежы, пераканайцеся ў якасці гуку і святла. Вы атрымаеце гарантаванае задавальненне і пачнеце збірацца да паездкі ў Камянец. Хтосьці слухае ўвосень вальс бастон і сумуе, я ж падпяваю гурту Slade і радуюся нават дажджлівым вераснем.

Лета — на фінішы, але творчае напружанне ў рэгіёнах не спадае. І справа не толькі ў дажынках, якія немагчыма ўявіць без удзелу клубных ды бібліятэчных работнікаў. У “рэпертуары” аддзелаў ідэалагічнай работы, культуры і па справах моладзі хапае іншых мерапрыемстваў, што вызначаюцца якасцю ды арыгінальнасцю. Узяць да прыкладу, “Яблычны Спас” у Алашках. Гэтае абласное свята на Шаркаўшчыне даўно стала брэндавым. І ладзіцца яно ў вёсцы, дзе жыў і працаваў садавод Іван Сікора, які вывеў 500 гатункаў яблыкаў, сто — ігруш, займаўся вырошчваннем сліў, бэзу, ружаў. У Алашках ёсць музей садавода і сядзіба, якую ён узвёў сваімі рукамі. Побач — помнік яблыку (ёсць такі і ў райцэнтры, і на павароце да Алашак), сцэна. Падчас свята быў канцэрт, працавала кавярня, можна было купіць сувенір, пачаставацца яблыкамі. Словам, мерапрыемства атрымалася і якасным, і арыгінальным. Ушаноўваўся не толькі яблык, але і знакаміты селекцыянер. Падвойны брэнд для вёскі і раёна. Дадам толькі, што ў Алашках можна прыдбаць і саджанцы ўнікальных яблынь. Калі пра гэта даведаюцца ўсе зацікаўленыя, у тым ліку і інвестары, свята можа стаць рэспубліканскім.

У летні “рэпертуар” нашых нястомных работнікаў культуры дадалася і традыцыйная жніўная тэма. Каравай без песні што неба без сонейка. У Буда-Кашалёўскім раёне тры камбайнавыя экіпажы перавысілі тысячны збожжавы намалот яшчэ на мінулым тыдні. Павіншаваць іх з перамогай прыехала на хлебную ніву ўсё кіраўніцтва раёна. А адзін з лепшых самадзейных калектываў краю — народны ансамбль “Губічанка” з Губіцкага сельскага дома культуры — выканаў для камбайнераў песню.