Пачаўся трэці этап продажу білетаў на ХХVІ Міжнародны фестываль мастацтваў “Славянскі базар у Віцебску”. Цяпер іх можна набыць праз касы і інтэрнэт не толькі ў амфітэатр, але і на ўсе тэатральныя і філарманічныя падзеі ў іншых залах.

Дырэктар Віцебскага абласнога метадычнага цэнтра народнай творчасці Кацярына Лабука ў абыход усіх забабонаў і прымхаў так прарэкламавала навінкі Міжнароднага фестывалю песні і музыкі “Дняпроўскія галасы ў Дуброўне”: “Сімвалам мерапрыемства стала свістулька, зробленая па традыцыях знакамітай майстрыхі Ганны Марачовай. Нават думаем музей адпаведны стварыць. І не верце, што ад свісту грошай не будзе. У маёй уласнай калекцыі, да прыкладу, каля трыццаці свістулек. І нічога кепскага ад гэтага не адбываецца”. Напярэдадні фестывальнага сезону гаворка ў Прэс-цэнтры Дома прэсы ішла пра імпрэзы, святы і конкурсы, канвеер якіх пачне набіраць абароты літаральна праз лічаныя тыдні.