Падавалася б, каго ў час шматмернага кіно ці фантастычных камп’ютарных эфектаў можна зацікавіць дыяфільмамі? Але некалькі гадоў таму ў Мінску з’явілася каманда акцёраў, рэжысёраў і музыкантаў, якая захапілася менавіта старымі казкамі на стужках. І сёння праект “Дыяфільм live” можна ўбачыць у музейных дворыках, кнігарнях, канцэртных залах ці нават проста на вуліцы ўсё часцей. Толькі гэта мае мала агульнага з пераключэннем карцінак на экране — гэта адразу і тэатр, і музыка, і анімацыя. Таму падчас паказаў можа падацца, што ты знаходзішся ў студыі, дзе агучваецца мультфільм, у іншы ж — на канцэрце, дзе Калабок спявае блюз, Дзядзя Сцёпа з казкі Сяргея Міхалкова гаворыць голасам Уладзіміра Высоцкага, а Мальчыш-Кібальчыш амаль што выконвае рок-оперу. Чаму аднаўляючы старыя стужкі, ствараеш штосьці новае, сучаснае і жывое, распавялі “К” самі ўдзельнікі “Дыяфільм live”.

“К” ужо пісала, што культурнай сталіцай Беларусі на 2019 год абраны Пінск, таму сёлета горад чакае больш гасцей, чым у любы іншы час. Калі вы яшчэ не былі там, але збіраецеся, даем падказку: пасля помніка палешуку на пешаходным кавалачку вуліцы Леніна, бадай, самы распаўсюджаны фон, што абіраюць і мясцовыя жыхары, і госці для сэлфі “Я ў Пінску” — вулічныя роспісы Яўгена САСЮРЫ. З ім і гутарым пра тое, дзе шукаць самыя “пінскія” краявіды і на што натхняе гісторыя горада дзяцінства.

Перамогу Міхаіла Басалыгі, які на сёлетнім Нацыянальным конкурсе “Мастацтва кнігі” быў названы найлепшым ілюстратарам за афармленне кнігі Уладзіміра Караткевіча “Хрыстос прызямліўся ў Гародні”, можна лічыць прадказальнай. Вядомы графік ужо не ўпершыню звярнуўся да творчасці знакамітага пісьменніка. Не будзе памылкай сказаць, што захапленне талентам Караткевіча было для мастака чымсьці накшталт першага кахання, якое звычайна застаецца на ўсё жыццё своеасаблівым камертонам. У творах пісьменніка Міхаіл Басалыга знайшоў сваю Беларусь — рамантычную і трагічную, велічную і пяшчотную. Кніжная аздоба — не адзіная іпастась творчасці мэтра. Справе папулярызацыі гісторыі і культуры Беларусі служаць і ягоныя станковыя аркушы, і выхаванне мастацкай моладзі. Павіншаваць спадара Міхаіла з узнагародай наведаліся ў ягоную майстэрню журналісты “К”.

Маладыя беларускія дызайнеры ўвасобілі маляваны рай мастачкі Алены Кіш на шаўковых тканінах. У сеціве нават новае слова з’явілася — хусткі-маляванкі. Добрая тэма для разваг пра тое, як музейныя каштоўнасці ўплываюць на сучасную моду — і наадварот.

Мастак і літаратар Адам ГЛОБУС працягвае серыю сяброўскіх замалёвак пра вядомых беларускіх творцаў. Гэтым разам герой яго нарыса — Уладзімір Кожух, чый заўчасны сыход стаў адной з найбольшых сёлетніх стратаў у айчынным мастацтве.

І першая серыя ўжо ёсць: “Тошка і яго сябры” — так называецца новая анімацыйная стужка рэжысёра. Галоўным героем трынаццаціхвіліннага фільма з’яўляецца хлопчык-бульбачка, які жыве ў гародзе і разам з сябрамі распачынае барацьбу з каларадскім жуком. Аглядальнік “К” завітала на кінастудыю “Беларусьфільм” да Аляксандра Ленкіна і паглядзела мульцік разам з аўтарам.

Помнік княгіні Анастасіі Слуцкай — заступніцы беларускага горада, які ўзгадваецца яшчэ ў “Аповесці мінулых гадоў” — усталявалі летась да 900-годдзя Слуцка. Вобраз арыстакраткі-ваяўніцы створаны скульптарам Сяргеем АГАНАВЫМ. Пра тое, як “скроіць” спадніцу, якая пасавала б даспехам, і прымірыць бронзу з гранітам — у размове з мастаком.