У акцёрскім асяроддзі жыццё віруе: новыя абліччы, новыя ўражанні. У такім свеце цікавых, таленавітых як не падтрымліваць кантакты з калегамі? Таму Інтэрнэт можа стаць добрай дапамогай для творчага чалавека.
1. Стасункі
З дапамогай сацыяльных сетак падтрымліваю знаёмствы. Напрыклад, летась мы арганізавалі сустрэчу з аднакурснікамі па Тэатральным інстытуце. Вельмі дапамагла сацыяльная сетка. Курс у нас быў невялікі — недзе чалавек дзесяць, — а пасля заканчэння ўсе раз’ехаліся: нехта ў Калінінградзе, нехта ў Мурманску, дый па ўсёй Беларусі аднакашнікаў нямала. Але дзякуючы Сеціву восем чалавек сустрэліся праз столькі гадоў!..
Віншую з днямі нараджэння блізкіх і далёкіх сяброў, а таксама калег — нашых беларускіх артыстаў. Інтэрнэт дапамагае не забывацца на даты. Ды, вядома, у свой юбілей паглядзеў віншаванні, цікава было пачытаць каментарыі.
3. Інфармацыя
Інтэрнэтам карыстаюся, каб даведацца пра навіны, калі няма часу паглядзець тэлебачанне. Для гэтага наведваю ў першую чаргу беларускія сайты. Цікавіць падача матэрыялу з розных пунктаў гледжання. Зразумела, “Культура” ў закладках таксама. А наогул, я не так шмат карыстаюся Інтэрнэтам. Трэба чытаць добрую літаратуру, а артыстам — ролі вучыць. Таму забаўкі ў Сеціве не шукаю.
Электронная пошта дапамагае ў працы: дасылаюць сцэны, планы здымак, сцэнарыі. І вядома ж, з калегамі за мяжой (напрыклад, з польскімі акцёрамі) можна кантактаваць. Вось я ўдзельнічаю ў здымках працягу “Белых Росаў” разам з літоўскім акцёрам Ёзасам Будрайцісам. Ён не толькі цудоўны артыст, але і вельмі таленавіты фотамастак. Пасля здымак калега выкладвае партрэты, здымкі з пляцоўкі на маёй старонцы ў сацыяльнай сетцы.
Кінастужкі з маім удзелам у Сеціве? Чаму ж не! Я ж не аўтар стужак ды і здымаюся не так шмат, таму ў гэтым сэнсе прэтэнзій да “піратаў” асаблівых не маю... Урэшце, калі фільмы ёсць у Інтэрнэце — няхай людзі глядзяць. Але ідэальны варыянт — каб усё было легальна.
Занатавала Вольга НАВІЦКАЯ
Фота Таццяны МАТУСЕВІЧ