Таццяна МІСЕВІЧ, бібліятэкар сельскай бібліятэкі аграгарадка "Івесь" Глыбоцкага раёна
1. А сайтаў шмат!
Трывалай практыкай для нас стала правядзенне “профільных” дэкад. Кожная прысвячаецца, скажам, беларускай кнізе, гістарычнаму раману, прыгодніцкай і фантастычнай літаратуры ці выданням на ваенную тэматыку… І дэкад такіх хапае на год. Вы запытаецеся: пры чым тут Інтэрнэт? Ды проста без яго мы не здолелі б ладзіць мерапрыемствы на самым сучасным узроўні. Справа ў тым, што ўсе метадычныя навінкі мы бяром з тэматычных сайтаў.
2. І відэапаэзіі радкі
Яшчэ адна ідэя з Інтэрнэту. Канешне ж, не так цікава, калі пад час нейкага мерапрыемства проста гучаць вершы. Мы такое чытанне “афарбоўваем”. Інакш кажучы, прапаноўваем пры гэтым адпаведную слайд-карцінку і настраёвую музыку, што значна павялічвае эфект ад праслухоўвання вершаваных радкоў.
3. Вас чакае фотакрос!
Гэта конкурс, што мы раз-пораз абвяшчаем сярод чытачоў. Выйграе той, хто зробіць і прэзентуе лепшы фотаздымак, тэматыка якога звязана з любоўю да кнігі. Практычна ў кожнага ёсць цяпер мабільнік з фотакамерай. Варта толькі задзейнічаць асабістую фантазію… Такі конкурс будзе праведзены сярод нашых аматараў чытання ў жніўні. Цягам месяца яны прапаноўваюць свае фота, а мы адбіраем лепшыя. Вось — і фотакрос, у выніку якога можна зладзіць у бібліятэцы арыгінальную выстаўку.
4. Чалавек — жывая кніга
Дзякуючы Інтэрнэту ў нас шмат сяброў. Час ад часу запрашаем іх у бібліятэку. Сябры дапамагаюць нам “ажыўляць” кнігі. Да прыкладу, фалькларыстка і журналістка часопіса “Алеся” Рэгіна Гамзовіч уразіла нашых чытачоў веданнем абрадаў і аўтэнтычных калектываў. Яна сама па сабе — жывая энцыклапедыя. Словам, для развіцця нашых краязнаўства і фалькларыстыкі спадарыня Гамзовіч зрабіла выключна шмат.
5. PR і рэклама праз сацыяльныя сеткі
Стэлажы з кнігамі — справа для бібліятэкі звыклая. На сёння гэтага мала. Менавіта Інтэрнэт падказаў нам у свой час, што выстаўку кніг можна з поспехам сумяшчаць з самымі рознымі тэматычнымі інсталяцыямі. Да прыкладу, кніжны стэлаж можна ўпрыгожыць здымкамі, якія перамаглі ў фотакросе. У якасці інсталяцыі мы выкарыстоўваем калажы. Пад час Вялікадня на паліцах з кнігамі выстаўлялі кулічы, велікодныя яйкі... Карацей, магчымасцей для праяў бібліятэчнай фантазіі — мора. Трэба толькі справу сваю паважаць ды любіць.