Традыцыйным ужо стаў удзел прадстаўнікоў мастацка-графічнага факультэта Віцебскага дзяржаўнага ўніверсітэта імя П.Машэрава ў міжнародных навукова-практычных канферэнцыях, пленэрах і мастацкіх выстаўках, якія праходзяць на базе Смаленскага дзяржуніверсітэта. А мы, у сваю чаргу, заўсёды рады бачыць смаленскіх сяброў на аналагічных мерапрыемствах у нас.
У Дзень яднання народаў Беларусі і Расіі ў экспазіцыйных залах універсітэта адкрылася чарговая сумесная мастацкая выстаўка пад назвай “Славянскі вянок”. Гэтым разам у экспазіцыі прадстаўлены алейны жывапіс, акварэль, графіка, скульптура, дызайн-праекты, творы дэкаратыўна-прыкладнога мастацтва педагогаў-мастакоў дзвюх устаноў.
На адкрыцці выстаўкі прысутнічалі госці: намеснік дэкана мастацка-графічнага факультэта Смаленскага дзяржаўнага ўніверсітэта В.Чарткова, заслужаны мастак Расіі прафесар В.Самарына, загадчык кафедры дызайна Ю.Усціменка, дацэнты кафедры дызайна І.Новікава і Т.Селякова.
Фёдар ШКІРАНДА
Віцебск