На сцэну Беларускага дзяржаўнага акадэмічнага музычнага тэатра выйшлі не толькі спевакі, хаця іх, вядома, было больш: юная Саша Няхай выступіла ў дуэце з Пятром Ялфімавым, Інга Кісялёва паўстала жывым увасабленнем мулявінскай "Чырвонай ружы", Маша Новік з Нацыянальнага цэнтра музычнага мастацтва імя У.Мулявіна замахнулася пераспяваць саміх бітлоў, таксама мы пачулі Крысціну Святлічную, Мішу Ліла, Тэатр песні "Хвілінка" ды многіх іншых. Канцэртная праграма аказалася прасякнута думкай, што эстрада — гэта яшчэ і інструментальная музыка (ансамбль скрыпачоў "Капрыс" Мінскага музычнага каледжа, біг-бэнд сталічнай Дзіцячай музычнай школы № 14), а таксама сучасная харэаграфія, цыркавое майстэрства.
Сапраўдным упрыгожаннем вечара сталі выхады навучэнкі харэаграфічнага каледжа Валерыі Грудзінай і ансамбля харэаграфіі БДУКіМ з яркімі сучаснымі нумарамі. Дадамо, што апошні калектыў літаральна напярэдадні трымаў яшчэ адну справаздачу: ладзіў сольны вечар на сцэне Маладзёжнага тэатра эстрады. І — ператварыў праграму ў цэласны завершаны спектакль, сатканы з адметных мініяцюр, пастаўленых выкладчыкамі і, што вельмі важна, самімі студэнтамі кафедры. Не менш важна і тое, што ўсе кампазіцыі былі рознымі — не толькі "лепшымі" ды "проста добрымі", але і вырашанымі ў розных стылістыках ды тэхніках: маўляў, нам усё падуладна, а фантазіі няма межаў.
Кульмінацыяй канцэрта лаўрэатаў фонду сталі абодва нумары цыркавой студыі "Арэна" з Мазыра. Гэта быў найвышэйшы пілатаж — неверагодныя гімнастычныя трукі і, адначасова, іх сэнсавае напаўненне, прасякнутае нацыянальнай ды касмічнай тэмамі. Дарэчы, мазырчане былі не адзінымі прадстаўнікамі рэгіёнаў: ад Віцебшчыны прыехалі Наста Васільева і Максім Пісарэнка, ад Магілёўшчыны — цэлая "анёльская" дэлегацыя на чале з Лідзіяй Заблоцкай. Таму канцэрт "Таленты Беларусі" ў чарговы раз даказаў, што зоркі (а фінальная песня Яўгена Алейніка, праспяваная Веранікай Цыкуновай і ўсімі ўдзельнікамі, так і называлася: "Зорная прастора") свецяць не толькі ў сталіцы…
Фота Аляксандра ДЗМІТРЫЕВА