Разам з новым стагоддзем менавіта тут нарадзіўся Фестываль народнай творчасці “Напеў зямлі маёй”. Фактычна ўсе вядучыя калектывы вобласці прайшлі праз фестывальныя пляцоўкі “Напеву…”, атрымаўшы такім чынам пуцёўкі ў доўгае творчае жыццё.
З першых сваіх крокаў фестываль прыцягвае пільную ўвагу і адчувае дзейсную падтрымку Мінскага аблвыканкама. За гэтыя гады аддзеламі культуры вобласці было атрымана ў якасці прызоў дванаццаць мікрааўтобусаў, музычныя інструменты, камп’ютары для студый гуказапісу, радыёмікрафоны, музычныя цэнтры, гукаўзмацняльная апаратура, CD/DVD-прайгравальнікі. Агульная колькасць такіх каштоўных падарункаў складае амаль дзвесце адзінак. Сёлетні, Х Фестываль народнай творчасці адбыўся ў Мар’інай Горцы, на радзіме кампазітара Ігара Лучанка, які ўзначаліў журы фестывалю. У фэсце бралі ўдзел дваццаць восем лепшых аматарскіх разнажанравых калектываў з ганаровымі званнямі “народны” і “ўзорны”.
Гран-пры фестывалю — мікрааўтобус “Газель” — атрымаў Узорны ансамбль народнай песні “Дзянніца” Клецкай ДШМ (кіраўнік — Вольга Нупрэйчык).
Фестываль адбыўся напярэдадні Дня работнікаў культуры. Начальнік Мінскага абласнога ўпраўлення культуры Анатоль Акушэвіч, выступаючы перад калегамі, завяршыў сваю прамову, як звычайна, вершам:
Аб нашай галіне не пішуць песні,
Не сачыняюць вершы і санеты,
Здаецца, што стараюцца
падкрэсліць,
Што мы ўдзячны будзем
і куплетам.
Зламаць і памяняць стэрэатыпы
Апошнім часам рэдка ўдаецца.
Але ж сядзець, глядзець
і шэрасць сыпаць
Нам не з рукі.
Няхай жа песня льецца!..
наш спецыяльны карэспандэнт
Мінск — Мар’іна Горка — Мінск
На здымках: моманты фестывалю.
Фота аўтара