Надзённыя пытанні, звязаныя з наладжваннем будучага рэспубліканскага свята, абмяркоўвалі прадстаўнікі Міністэрства інфармацыі Рэспублікі Беларусь, супрацоўнікі Віцебскага аблвыканкама і Глыбоцкага райвыканкама. Прысутнічалі рэжысёрска-пастановачная група і галоўны мастак свята.
Па словах намесніка начальніка ўпраўлення культуры, у Дні беларускага пісьменства будзе задзейнічана шэсць аб’ектаў Глыбоцкага аддзела культуры. Сёння тут вядуцца работы па рамонце і рэканструкцыі.
Удзельнікі рабочай групы прыйшлі да згоды пры абмеркаванні канцэпцыі свята. На ўсіх цэнтральных вуліцах раённага цэнтра прадставяць гісторыю ўзнікнення і сённяшні дзень пісьменства. Мяркуецца, што ў рэжыме “вольнага паветра” запрацуюць не толькі вуліца Пісьменніцкая, але і Маладзёжная, Дзіцячая, Спартыўная… А на знаёмых ужо падворках выступяць народныя калектывы вобласці ды рэспублікі, будзе рэалізоўвацца прадукцыя гандлёвых, прамысловых арганізацый.