Ханс Баум цягам дзесяцігоддзяў працаваў у буйной камп'ютарнай карпарацыі, дзе займаў розныя пасады. У нашай краіне ён з 1994 года спалучаў паспяховую прафесійную дзейнасць з захапленнем мастацтвам, пры гэтым аддаючы перавагу графіцы, а таксама тэхніцы калажу і асамбляжу. Частка гэтых твораў і складзе аснову выстаўкі ў Музеі сучаснага выяўленчага мастацтва.
У аснову творчасці Ханса Баума пакладзены фармальны эксперымент з прадметамі штодзённага карыстання, фрагментамі рэчаіснасці. Пры пабудове кампазіцыі аўтар выкарыстоўвае камбінацыю гэтых разнастайных і рознатыповых матэрыялаў, іх напластаванне, нечаканыя спалучэнні, асаблівую ўвагу надае фактуры, што, па сутнасці, з'яўляецца асновай прыёму калажу.