З акцэнтам на культурнай "сталічнасці" Нясвіжа пройдзе і традыцыйная навуковая канферэнцыя. Яе матэрыялы ўжо сабраны ў кнігу, прэзентацыя якой запланавана на час форуму. Яшчэ адной новай рысай свята стане далучэнне да яго новай сцэнічнай пляцоўкі. Канцэртная праграма "Шляхі мецэнацтва", прымеркаваная да 500-годдзя дынастыі Радзівілаў, адбудзецца ў Тэатральнай зале Палацавага ансамбля Нясвіжа. Тут выступяць практычна ўсе творчыя калектывы Нацыянальнага акадэмічнага канцэртнага аркестра Беларусі на чале з народным артыстам краіны, прафесарам Міхаілам Фінбергам, які з'яўляецца мастацкім кіраўніком свята. Дадамо, што менавіта гэты славуты аркестр - адзін з галоўных ініцыятараў і арганізатараў падобных фестываляў, якія праводзяцца дзякуючы садзейнічанню Міністэрства культуры Беларусі, Мінаблвыканкама і Нясвіжскага райвыканкама.
Распачнецца свята, паводле традыцыі, тэатральным спектаклем, але ўрачыстым адкрыццём стане канцэрт "На музычных скрыжаваннях: Беларусь - Расія". Яго папярэдзіць адкрыццё мастацкай выстаўкі "Адлюстраванне душы" з твораў Міхася Сеўрука. Як заўсёды, прэзентуюць свае работы дзеці - удзельнікі Студыі выяўленчага мастацтва Палаца культуры Мазырскага нафтаперапрацоўчага завода.
Музычная асамблея ў Нясвіжскай гарадской ратушы сёлета будзе прысвечана такой выдатнай постаці айчыннага мастацтва, як Міхал Клеафас Агінскі. А завершацца святкаванні праграмай "Шансон у Нясвіжы", падрыхтаванай аркестрам і яго шматлікімі салістамі.
Н.Б.