Ганаровае права ўдзелу ў фінале праекта атрымаюць пяць папярэдне адабраных выканаўцаў: Алена Ланская, Гюнэш (яна, дарэчы, змяніла сваю конкурсную песню), Вікторыя Алешка, Юзары і гурт "Litesound" - менавіта ў такім парадку, паводле праведзенага 24 студзеня лёсавання, яны выйдуць на сцэну.
"Усе ўдзельнікі конкурсу настроены вельмі сур'ёзна. Артысты ўдакладняюць свае аранжыроўкі, пастановачныя нумары. Некаторыя нават вырашылі змяніць песню!" - адзначыла прадзюсар "ЕўраФэсту" Настасся Ціхановіч. Пераможца конкурсу (а значыць, прадстаўнік нашай краіны на "Еўрабачанні-2012") атрымае прыз - "Хрустальную птушку". Працэс галасавання ж адбудзецца па сістэме, якая выкарыстоўваецца для самога "Еўрабачання".
Дарэчы, сцэна пад час фіналу "ЕўраФэсту" будзе аформлена ў стылі п'есы Морыса Метэрлінка "Сіняя птушка". Акрамя таго, будуць выкарыстаны 3D-тэхналогіі і палепшана якасць тэлевізійнай "карцінкі".
Падтрымаць жа канкурсантаў прыедуць "зоркі" "Еўрабачання" мінулых гадоў Руслана, Марыя Шэрыфовіч, Сакіс Рувас, а таксама прадстаўнікі Еўрапейскага вяшчальнага саюза.
Ф.А.