Як паведамілі карэспандэнту "К" у выдавецтве "Беларуская энцыклапедыя", кніга-альбом таксама змяшчае выявы страчаных на наш час прадметаў царкоўнай даўніны, ікон і царкоўнага начыння, надмагілляў, замалёўкі старажытных курганоў і гарадзішчаў, панарамы беларускіх гарадоў.
Арыгінальны альбом Дзмітрыя Струкава на сённяшні дзень захоўваецца ў аддзеле рэдкай кнігі бібліятэкі Вільнюскага ўніверсітэта і з'яўляецца ўнікальным сведкам беларускай даўніны, прадметы якой у дадзены час ужо не існуюць і фактычна "сцёрты" часам ды агнём самых розных падзей - ад ваеннага ліхалецця да ідэалагічнай нецярпімасці ў перыяд панавання атэізму.
Як плануецца, кніга-альбом малюнкаў Дзмітрыя Струкава будзе выпушчана ў межах праекта "Энцыклапедыя рарытэтаў". Першым паспяховым яго выданнем стаў альбом "Радзівілы. Альбом партрэтаў XVIII - XIX стагоддзяў", а другім - кніга-альбом "Жывая вера. Ветка", аб якіх у свой час пісала "К".