Знайсці кіназдымачную групу было не 
складана: любы мясцовы жыхар, каго ні спытаеш, пакажа кірунак.
- Сёння яны - у вёсцы Брадок, - кажа сустрэчны і тлумачыць, па якой дарозе ехаць.
Карціна здымаецца хутка. У чацвер быў 32-і дзень працы - роўна палова з адведзеных на здымкі. У фільме пераплятаюцца прыгоды, эксцэнтрыка, лірыка і... філасофія. Даўно на нашых экранах не было камедый у стылі класікаў жанру Эльдара Разанава, Георгія Данэліі, Леаніда Гайдая...
Сяброўскі калектыў кінагрупы пад кіраўніцтвам нешматслоўнага Мікалая Князева робіць уражанне зладжанага арганізма, які "выпрацоўвае" сур'ёзным чынам лірычную камедыю.
- Прапанова старшыні Дзяржтэлерадыёкампаніі Генадзя Давыдзькі зняць фільм па сцэнарыі Канстанціна Вараб'ёва была для мяне неспадзяванкай, - адзначыў Мікалай Князеў. - Мае работы ў кіно - "Вогненны стралок", "Шалёнай страсцю ты сама да мяне палаеш", "Пайсці і не вярнуцца" - не назавеш камедыямі, хоць у кожным фільме ёсць добрае стаўленне да жыцця. Магчыма, прыйшоў час мне яму ўсміхнуцца...
На ролю Бельмандо абралі ката Clever Ice of Klaudio Hone. У побыце ён - Сняжок, а тытул атрымаў у спадчыну. Кот не просты: летась у Мілане ён стаў чэмпіёнам Еўропы, а ў роднай Беларусі ўваходзіць у сямёрку лепшых катоў краіны.
- З трохсот прэтэндэнтаў выбралі! - з гонарам кажа гаспадар Сняжка, мінчанін Ігар Капуза. Прывяду фрагмент сцэнарыя фільма, "падгледжаны" на пляцоўцы:
"...Глюкін з сумкай пад пахай уваходзіць у двор. Ён - у хатніх пантофлях, у пакамечаным, але калісьці элегантным, пінжаку. На павадку ў яго - лахматы дварняк. У глыбіні двара мужчына выбівае дыван. Глюкін падыходзіць да яго.
Глюкін. Прабачце, што адцягваю ўвагу, аднак... Пачакай... Ды спыніся ты! Тут такая нескладуха. Учора прэмію адзначалі. Ты разумееш!.. Ну вось, а мая законная... жонка, так бы мовіць, яна з сяброўкай, што тут, побач, у крамцы працуе, дамовілася не адпускаць мяне, разумееш? Выхоўвае..."
Карацей, абяцаючы пасцерагчы дыван разам з Шарыкам, Глюкін угаворвае сустрэчнага на авантуру. Калі ж той, добрая душа, вяртаецца, то "...застывае ў здзіўленні перад пустой перакладзінай, на якой толькі што вісеў дыван, а прывязаны да стойкі сабака ветліва махае хвастом..."
Гэта пачатак фільма, а чым ён скончыцца, мы даведаемся ў навагоднюю ноч 2012-га на Першым канале.
Юрый ІВАНОЎ Фота аўтара
P.S. 32-і здымачны дзень праходзіў у вёсцы Брадок каля дома на вуліцы Зарэчнай, 41. Кот сям'і Раісы і Міхаіла Чаркасаў па мянушцы Цімон з нейкім уласным інтарэсам назіраў за здымкамі. Дзіва што! Галоўны герой фільма - кот!..