Пад час рабочай паездкі старшыня Нацыянальнага аргкамітэта Анатоль Тозік быў азнаёмлены з вынікамі і ходам работ па падрыхтоўцы да свята, а таксама правёў нараду з членамі аргкамітэта Дня беларускага пісьменства, на якім была дадзена ў цэлым станоўчая ацэнка выкананню запланаваных падрыхтоўчых мерапрыемстваў.
Начальнік аддзела культуры Ганцавіцкага райвыканкама Ірына Марцінкевіч удакладніла для "К", што разам з намеснікам Прэм'ер-міністра Анатолем Тозікам у аглядзе аб'ектаў, якія будуць задзейнічаны пад час свята, і ў нарадзе прынялі ўдзел міністр інфармацыі Рэспублікі Беларусь Алег Праляскоўскі і намеснік старшыні Брэсцкага аблвыканкама Леанід Цупрык.
Работы на ўсіх пяці аб'ектах культуры Ганцавічаў, па словах Ірыны Марцінкевіч, ужо скончаны ці блізкія да завяршэння.
У горадзе працягваецца конкурс на самую старую кнігу, абвешчаны сярод жыхароў Ганцавічаў. Пад час Дня беларускага пісьменства журы вызначыць пераможцаў па трох намінацыях: "Самая старая кніга для дарослых", "Самая старая кніга для дзяцей", "Самае старое перыядычнае выданне".
Да свята рыхтуюцца і мясцовыя творцы.