Распачалася паэтычна-музычная імпрэза ля памятных камянёў, якія былі ўсталяваны на перакрыжаванні дарог на Ракуцёўшчыну і суседнюю вёску Чысць. Госці ўскладалі кветкі, казалі прывітальныя словы, успаміналі беларускіх літаратараў і краязнаўцаў, якія ў 1970-я знайшлі гэтае месца (да таго часу было невядома, дзе жыў Багдановіч улетку 1911 года), а пазней, у 1981-м, сталі ініцыятарамі стварэння ля помніка першага на Беларусі пісьменніцкага парку пад назвай "Максімаў сад".
Сярод іншых гасцей, пабываў на свяце і міністр культуры Рэспублікі Беларусь Павел Латушка. А як адзначыў намеснік міністра Тадэуш Стружэцкі, гэты год, калі шырокая грамадскасць святкуе юбілей з дня нараджэння Максіма Багдановіча, сапраўды дае магчымасць людзям яшчэ больш спрычыніцца да творчасці класіка нашай літаратуры.
Адметна, што сярод прысутных была і Маргарыта Пярова - унучатая пляменніца Вацлава Лычкоўскага. На фестываль таксама прыехалі Ірына Ніжанкоўская - прыёмная дачка Браніслава Тарашкевіча, Вольга Дашкоўская - далёкая сваячка Багдановіча... Зразумела, прысутнасць нашчадкаў знакамітых беларусаў надало святу асаблівы каларыт і незабыўнасць.
Уся шматлюдная працэсія пад спевы ансамбля "Талака" рушыла непасрэдна да Ракуцёўшчыны. Далей імпрэза працягвалася ўжо непасрэдна на сцэне. Уладзімір Трапянок у вобразе Максіма Багдановіча, саліст Беларускага дзяржаўнага ансамбля "Песняры" Андрэй Усанаў, іншыя артысты беларускай эстрады, а таксама пісьменнікі Анатоль Бутэвіч, Навум Гальпяровіч, Людміла Рублеўская, Віктар Шніп ды шмат хто яшчэ радавалі публіку багдановічаўскімі радкамі, песнямі на вершы паэта і творамі, на якія класік натхніў сваіх таленавітых паслядоўнікаў.
Надзея ПЯКАРСКАЯ, студэнтка Інстытута журналістыкі БДУ