Новае аблічча Опернага

№ 36 (802) 08.09.2007 - 14.09.2007 г

Каб адчуць і зразумець рытм работы на Оперным, трэба прайсціся па ягоных паверхах, прыслухацца да гукаў будоўлі, хоць раз папрысутнічаць на штодзённых пасяджэннях штаба па аднаўленні славутага помніка архітэктуры.

 /i/content/pi/cult/128/600/Operny1.jpg
 Тут размесціцца сцэна.
На аб’екце няма ні перакураў, ні аўральнай мітусні: кожны з соцень будаўнікоў ведае ўласны аб’ём штодзённых работ, будоўля нагадвае адладжаны механізм. І толькі дзяржзаказчыку, ген- і субпадрадчыкам, прадстаўнікам Міністэрства культуры, “Белдзяржпраекта”, іншых зацікаўленых рэспубліканскіх структур дакладна вядома, якімі высілкамі дасягаецца гэтая зладжанасць.
Натуральна, не абыходзіцца без хуткацечных канфліктаў і спрэчак, у выніку якіх не нараджаецца, а мэтанакіравана ажыццяўляецца ісціна, — Оперны трэба здаць у эксплуатацыю згодна з графікам. Дарэчы, больш за 30 мільярдаў рублёў, выдаткаваных па плане 8 месяцаў на рэстаўрацыю і рэканструкцыю тэатра, асвоены ў поўным аб’ёме.Дальбог, Іосіф Лангбард быў бы расчулены, калі б пабачыў пазалоту столевай ляпніны ў фае першага яруса ці шыкоўны плітачны арнамент падлогі ў адміністрацыйных
 /i/content/pi/cult/128/600/OPerny4.jpg
 Балетна-рэпетыцыйная зала першага
пускавога комплексу.
памяшканнях, дзе месцяцца артыстычныя пакоі для салістаў і сонечная рэпетыцыйна-балетная зала…
Старшыня штаба, намеснік міністра культуры РБ У.Грыдзюшка даводзіць на пасяджэнні, якое адбылося 6 верасня, што першы пускавы комплекс — палова адміністрацыйна-гаспадарчых і рэпетыцыйных памяшканняў — практычна гатовы да здачы ў эксплуатацыю. Сюды перамяшчаюцца оперная і балетная трупы. Вызваляецца другі пускавы комплекс — другая палова адміністрацыйна-гаспадарчага корпуса, хоць выбарачныя работы на ім ужо распачаты. Найпершая задача: управіцца да зімы з цеплавым контурам, развесці ўсе камунікацыі, запоўніць аконныя праёмы...
Справа рухаецца і на трэцім пускавым — глядзельная зала і памяшканні тэхзабеспячэння
 /i/content/pi/cult/128/600/Operny3.jpg
 Аздабленне фае на трэцім паверсе.
сцэны. Тут яшчэ нядаўна працавала больш за сотню лепшых тынкоўшчыкаў Беларусі — удзельнікаў Рэспубліканскага конкурсу прафесійнага мастацтва.“Прамтэхмантаж” вядзе ўладкаванне аркестравай ямы. Завершаны работы па аднаўленні даху, мантажы металаканструкцый перакрыццяў над залай, узмацненні калон, працягваецца аддзелка памяшканняў (“Неабходна ўзяць пад кантроль пастаўкі граніту!” — даводзіць У.Грыдзюшка), упарадкаванне камунікацый і тэрыторыі.
Як распавядае прадстаўнік генпадрадчыка К.Белавец, намеснік гендырэктара ЗАТ “НВА “Эльвіра” па вытворчасці, наколькі унікальны будынак тэатра, настолькі адмысловыя і работы на ім — і інжынерна-будаўнічыя, і аддзелачныя. Колер фасадаў такі ж, як і ў праекце Лангбарда. Побач — ужо гатовая аўтамабільная стаянка. Зроблены кветнікі. Як ні цесна на прылеглых да будынка тэрыторыях, але ніводны дубок у оперным скверы не пацярпеў.
Выгляд новай білетнай касы, суперсучасныя парэнчы на лесвіцах адміністрацыйнага будынка, высокамастацкая тынкоўка сцен у калідорах з выкарыстаннем самых апошніх аддзелачных матэрыялаў яскрава пераконваюць, што новы змест выгодна падкрэслівае старую акадэмічную форму. Нават чатыры оперныя люстры (у тым ліку і з галоўнай залы), зношаныя з 1930-ых гадоў ушчэнт, таксама будуць узноўлены з сучасных матэрыялаў і па апошніх тэхналогіях.

Андрэй СТАРЖЫНСКІ
Фота Андрэя СПРЫНЧАНА