Якасна новым крокам у развіцці музейнай дзейнасці мусіць стаць навукова-практычны семінар "Літаратурныя музеі Расіі і Беларусі: праблемы і перспектывы супрацоўніцтва", які адбудзецца напрыканцы красавіка на базе Дзяржаўнага мемарыяльнага музея-запаведніка А.С. Пушкіна "Міхайлаўскае", што знаходзіцца на Пскоўшчыне. Ён прымеркаваны да 100-годдзя з моманту адкрыцця першай музейнай экспазіцыі ў Міхайлаўскім.
Ад нашай краіны плануюць прыняць удзел супрацоўнікі Дзяржаўнага літаратурнага музея Янкі Купалы, Дзяржаўнага літаратурна-мемарыяльнага музея Якуба Коласа, Дзяржаўнага музея гісторыі беларускай літаратуры. Кожнаму з іх ёсць чым падзяліцца, у тым ліку сваімі цікавымі і арыгінальнымі распрацоўкамі.
Асобным пунктам у праграме семінара пазначана перспектыва будучых сумесных праектаў у 2012-м, калі будзе адзначацца 130годдзе класікаў беларускай літаратуры Янкі Купалы і Якуба Коласа.
Тым часам Літаратурны музей Максіма Багдановіча рыхтуецца шырока адзначыць сваю 30-ю гадавіну. За гэтыя дзесяцігоддзі былі створаны асноўная экспазіцыя Літаратурнага музея, пастаянныя выстаўкі, размешчаныя ў двух філіялах - "Беларуская хатка" і "Фальварак Ракуцёўшчына". Да таго ж, сярод разнастайных мерапрыемстваў па ўшанаванні беларускага паэта, 120-годдзе з дня нараджэння якога адзначаецца сёлета, распачаўся конкурс на стварэнне арыгінальнага лагатыпа Літаратурнага музея Максіма Багдановіча.