Пад час урачыстасцей міністр культуры Рэспублікі Беларусі Павел Латушка падкрэсліў ролю апякунскіх саветаў, якія цяпер змогуць ствараць арганізацыі культуры, адзначыўшы значную ролю спонсарскай дапамогі ў рэалізацыі новых тэатральных праектаў і фінансаванні гастролей. Міністр нагадаў, што ў хуткім часе запланавана і першае ўручэнне Нацыянальнай тэатральнай прэміі.
Лаўрэатам "Хрустальнай Паўлінкі" стала артыстка Беларускага рэспубліканскага тэтара юнага гледача Вера Кавалерава. Прыз "Хрустальны анёл" сёлета - у руках артыста Беларускага дзяржаўнага тэатра лялек Уладзіміра Грамовіча. За вялікі ўнёсак у развіццё тэатральнага мастацтва "Хрустальнай зоркай" уганараваны артыст Тэатра-студыі кінаакцёра Пётр Юрчанкоў. Дзве ўзнагароды апынуліся ў Нацыянальным акадэмічным драматычным тэатры імя Максіма Горкага: "Хрустальная кветка" за самы яркі дэбют- у артыста Руслана Чарнецкага, а прыз "Натхненне" - у дырэктара ўстановы Эдуарда Герасімовіча.
Гэтымі ж днямі Дзяржаўны музей гісторыі тэатральнай і музычнай культуры Рэспублікі Беларусь сумесна з Беларускім фондам культуры падвёў вынікі Рэспубліканскага конкурсу мастакоў тэатраў на саісканне прэміі імя І.Ушакова. Пераможцай гэтага года стала мастачка Алена Ігруша за сцэнаграфію да "Офіса" купалаўцаў, а ганаровую грамату БФК і магчымасць правесці персанальную выстаўку ў Музеі гісторыі тэатральнай і музычнай культуры атрымаў мастак Уладзімір Пазняк за сцэнаграфію да пастаноўкі Гродзенскага абласнога драматычнага тэатра "Казка дзікага лесу".
Старшыня Нацыянальнай камісіі Рэспублікі Беларусь па справах UNESCO Уладзімір Шчасны на ўрачыстасцях у музеі ўручыў дыплом міжнароднай арганізацыі за прапаганду беларускага тэатральнага мастацтва ў СМІ. Яго лаўрэатам стала журналістка Беларускага радыё Наталля Баўкалава.