Як адзначыла першы сакратар пасольства Наталля Садоўская, пра выдадзеную на беларускай, рускай, украінскай і англійскай мовах кнігу распавядуць прадстаўнікі Беларускага фонду культуры. Яны пазнаёмяць аўдыторыю з жыццёвым і творчым шляхам Караткевіча. Пад час прэзентацыі выступіць беларускі калектыў "Лёс" з Таліна, што дзейнічае ў аднайменным Беларускім таварыстве культуры.
У Таліне, дарэчы, знаходзяцца беларуская нядзельная школа і Грамадская бібліятэка беларускай літаратуры імя Караткевіча. Апошняя да юбілею класіка атрымала 2000 кніг на беларускай мове. Варта згадаць, што творы Уладзіміра Караткевіча раней былі перакладзены і на эстонскую.
Беларусы замежжа, падкрэслім, дэманструюць актыўную цікавасць да таго, што адбываецца ў нашай краіне: гэта пацвярджае сустрэча 12 сакавіка ў Рызе кіраўнікоў аб'яднанняў нашых землякоў у Еўропе. Яны правялі "круглы стол" "Беларусь - неад'емная частка Еўропы. Кансалідацыя беларусаў замежжа". На ім прысутнічалі прадстаўнікі суполак з Эстоніі, Расіі, Латвіі, Літвы і Украіны.