Падобныя гастролі, якія ўжо самі па сабе сталіся для нашага музычнага тэатра гэткім "гістарычным рарытэтам", патрэбны яму, бы свежае паветра. Праграма складзена так, каб ахапіць амаль усе кірункі працы тэатра. З класічных аперэт абрана "Лятучая мыш" І.Штрауса, з балетных праграм - нядаўна адноўленыя "Кармэн-сюіта" Ж.Бізэ- Р.Шчадрына і дывертысмент са "Шчаўкунка" П.Чайкоўскага. Захоча тамтэйшая моладзь мюзікл - пойдзе на рэвю "Аднойчы ў Чыкага". Рок-оперу? Паглядзіць "Юнону і Авось" А.Рыбнікава. Прыхільнікаў жа музычнай камедыі прывабіць "Аршын мал алан" У.Гаджыбекава. Шкада, вядома, што няма ў афішы ніводнага беларускага твора, але, будзем спадзявацца, тым з большай цікавасцю яго будуць чакаць у наступны прыезд.
Беларускія гледачы, у сваю чаргу, убачаць "Рэвізор" М.Гогаля, "Рамэа і Джульету" У.Шэкспіра, "Вішнёвы сад" А.Чэхава, "Грэх" паводле "Зыкавых" М.Горкага і "Benvenuto, Атэла!" К.Людвіга.