"Беларускі дзяржаўны музей гісторыі Вялікай Айчыннай вайны сустрэне гэтую дату на Гродзеншчыне, дзе лінію абароны трымала ў той далёкі час 56-я дывізія. У фартыфікацыйных збудаваннях перад гледачамі разгорнецца інсцэніроўка ваенных дзеянняў, распрацаваная музеем. Будзе выкарыстана нават знамя той самай дывізіі, якое сёння захоўваецца ва ўстанове", - паведамляе яе навуковы сакратар Галіна Бабусенка.
Таксама ў розных арганізацыях, установах культуры і адукацыі будзе дэманстравацца выстаўка пад назвай "Пачатак", якая прадставіць рэчы, што сталі сведкамі таго нялёгкага часу. Гледачы пабачаць змястоўную мультымедыйную прэзентацыю. З гэтай выстаўкай пазнаёмяцца не толькі беларусы, але і жыхары... Салехарда, цэнтра Ямала-Ненецкай аўтаномнай акругі. Супрацоўнікі музейнага комплексу гэтага горада запрасілі беларускіх музейшчыкаў паўдзельнічаць у культурна-адукацыйнай акцыі "Тыдзень у музеі", і пад час іх сустрэчы адбудзецца культурны ўзаемаабмен.
Рыхтуецца да Дня ўсенароднай памяці ахвяр Вялікай Айчыннай і Гомельскі абласны музей ваеннай славы. Ужо вядома, што тымі днямі даследчыкі розных краін збяруцца на Міжнародную навукова-практычную канферэнцыю, тэмай якой стане Гомель у пачатку і ў ходзе вайны. Наведвальнікі музея пабачаць выстаўкі, арганізаваныя сумесна з Магілёўскім абласным музеем і Брэсцкай крэпасцю. Сёння ў розных райцэнтрах Гомельшчыны праходзяць перасоўныя выстаўкі на ваенную тэматыку.
Варта дадаць, што экспазіцыя пра жыццё рэгіёна ў час вайны будзе дэманстравацца цягам пяці месяцаў (акурат да канца чэрвеня) у шатландскім горадзе Абердзіне. Каля сотні ўнікальных экспанатаў прадставіў днямі на вернісажы дырэктар гомельскага музея Павел Ждановіч, які да гэтай пары яшчэ знаходзіцца там. Абердзін з'яўляецца пабрацімам Гомеля, сувязі ж двух гарадоў налічваюць ужо 20 гадоў. Выстаўку з фондаў Музея ваеннай славы пабачаць жыхары і іншага горада-пабраціма Гомеля - французскага Клермон-Ферран - у пачатку наступнага года.