Сёлетняе мерапрыемства, арганізаванае ўпраўленнем культуры Гомельскага аблвыканкама і Гомельскім абласным цэнтрам народнай творчасці, падарыла жыхарам Мазыра, Светлагорска, Рэчыцы і Гомеля магчымасць убачыць лепшыя дасягненні рэгіянальнай сцэны.
У рэпертуарную афішу агляду-конкурсу ўвайшлі спектаклі "Паўлінка" і "Прымакі" Янкі Купалы, "Палачанка" Аляксея Дударава, "Лявоніха на арбіце" і "Трыбунал" Андрэя Макаёнка ды многія іншыя. Амаль усе аматарскія тэатры прадэманстравалі належны ўзровень рэжысуры і выканальніцкага майстэрства, сцэнаграфіі, музычнага вырашэння, сцэнічнай культуры.
Аднагалосным рашэннем журы было прысудзіць дыплом лаўрэата конкурсу народнаму тэатру "Спадчына" Светлагорскага гарадскога цэнтра культуры. Спектаклі гэтага калектыву вылучаюцца глыбінёй філасофскага і сацыяльнага гучання, вобразным рэжысёрскім рашэннем. Нязменным кіраўніком народнага тэатра з'яўляецца Ада Кузьмянкова.
Дыпломы І, ІІ і ІІІ ступені атрымалі народныя тэатры Капаткевіцкага ГДК Петрыкаўскага раёна, Веткаўскага, Рэчыцкага і Рагачоўскага ГДК.
Лілія БЫЧКОВА, вядучы метадыст па тэатральным мастацтве Гомельскага абласнога цэнтра народнай творчасці