Праграму "Культурная сталіца Садружнасці" распрацоўвае Міждзяржаўны савет, што складаецца з прадстаўнікоў міністэрстваў культуры краін СНД, і незалежныя эксперты ў галіне культурнай палітыкі кожнай з краін. Пасяджэнне, дзе эксперты разглядалі шэраг пытанняў наконт горада, праводзілася ў Мінску на гэтым тыдні. На ім дапрацоўвалі Палажэнне аб праекце, абмяркоўвалі дакументы і фарміравалі план мерапрыемстваў, якія неабходна ажыццявіць, каб сталіца апраўдала сваё званне.
Культурнай сталіцай кожны год будзе называцца адзін з гарадоў дзяржаў - удзельніц СНД на падставе конкурсу (краіны вызначаюцца ў алфавітным парадку). Ён павінен быць гістарычным, культурным і турыстычным цэнтрам, мець развітую інфраструктуру. На сёння вядома, што канцэпцыя ўключае чатыры групы праектаў, якія будуць рэалізаваны ў Культурнай сталіцы: праекты краін Садружнасці, нацыянальныя, інфраструктурныя і гасцявыя праекты.
Некалькімі тыднямі раней беларускі бок прапаноўваў для надання такога статуса Нясвіж, пазней, на пасяджэнні экспертаў з СНД, быў названы Гомель. Аднак канчаткова горад будзе вызначаны значна пазней, калі праграма стане дакладна акрэсленай.