Хаця назва для выстаўкі кшталту "Эксперымент" у сучасных рэаліях пасуе хутчэй постмадэрнісцкаму мастацтву, да рэалістычных эцюдаў і замалёвак майстра яно таксама падабрана трапна. Канешне, надзвычайнай экспрэсіяй стыль аўтара не вылучаўся - пейзажы і нацюрморты на яго акварэлях (дарэчы, таксама як і на палотнах алеем) вельмі спакойныя, лірычныя. Аднак месца пошуку ў сваёй творчасці жывапісец таксама адвёў.
Эксперыментуе мастак з тэхнікамі акварэлі: у адной невялічкай зале знайшлі месца і эцюды "па-сырому", і тонка прапісаныя творы, і акварэлі з выкарыстаннем "мазаічнай" тэхнікі накладання мазка, некаторыя і ўвогуле блізкія да пуантылізму.
Празрыста-вытанчаныя і густа-насычаныя, акварэлі Мішчанкі нясуць гледачу пэўны настрой. Аўтар не гуляе з прыёмамі, а свядома падыходзіць да прымянення той або іншай акварэльнай тэхнікі- і мазок добра паддаецца яму, выдатна выяўляе задуманае. Відаць, таму кавун на эцюдах Мікалая Яўгенавіча такі сакавіты, пялёсткі ружы такія вытанчаныя, а пэндзлі, здаецца, яшчэ мокрыя пасля працы мастака. Тонка перадае Мішчанка станы прыроды: ранняя вясна на яго акварэлях слякатна-шэрая, зіма - мякка-светлая, лета - спакойна-радаснае...
Д.Д.