Беларуская культура панесла цяжкую страту: пайшоў з жыцця вядомы кінарэжысёр-пастаноўшчык, народны артыст Беларусі Ігар Міхайлавіч Дабралюбаў.
Для шматгадовай і плённай дзейнасці І.М. Дабралюбава былі характэрны высокая маральная і творчая патрабавальнасць, актыўная грамадзянская пазіцыя. Багатая палітра выразных сродкаў і глыбокае эмацыйнае напаўненне яго фільмаў, патрыятызм і жыццесцвярджальная сіла творчасці дазволілі яму заняць годнае месца ў шэрагу знакамітых майстроў экрана, атрымаць заслужанае прызнанне кінагледачоў як у Беларусі, так і далёка за яе межамі. Створаныя І.М. Дабралюбавым мастацкія фільмы "Іван Макаравіч", "Белыя Росы", "Расклад на паслязаўтра", "Плач перапёлкі" і іншыя да гэтай пары карыстаюцца вялікай папулярнасцю ў шматлікай аўдыторыі гледачоў.
І.М. Дабралюбаў удзельнічаў у падрыхтоўцы маладых кінематаграфістаў. Пад яго мастацкім кіраўніцтвам таксама з'явіліся вядомыя стужкі "Па сакрэце ўсяму свету", "Дзіўныя прыгоды Дзяніса Караблёва".
Прынцыповасць і патрабавальнасць, у першую чаргу - да сябе, добрае, уважлівае стаўленне да людзей здабылі яму ў кінематаграфічным асяродку непадробную любоў і шчырую павагу.
Міністэрства культуры Рэспублікі Беларусь глыбока смуткуе з нагоды незаменнай страты і выказвае глыбокае спачуванне родным і блізкім нябожчыка.
Светлая памяць аб выдатным майстры кіно, добрым і сціплым чалавеку, грамадзяніне Беларусі назаўсёды захаваецца ў нашых сэрцах.
П.П. ЛАТУШКА, А.А. ДУДАРАЎ, І.М. ЛУЧАНОК, В.І. ВАСІЛЬЕЎ, С.І. СУХАВЕЙ, Р.Б. СМОЛЬСКІ, У.В. ГАСЦЮХІН, А.В. ЯФРЭМАЎ, Ю.М. ЦВЯТКОЎ, Р.І. ЯНКОЎСКІ, У.П. ЗАМЯТАЛІН.