Кіраўнік нашай дзяржавы традыцыйна адкрывае ўрачысты тыдзень "Славянскага базару...". І сёлета Аляксандр Лукашэнка, пажадаўшы форуму добрага шляху, адзначыў: "Акунуўшыся ў атмасферу фестывалю, добра разумееш: славянскае адзінства - ёсць".
Канешне ж, непаўторную атмасферу фестывалю стварае сам Віцебск, яго жыхары, увесь наш гасцінны і таленавіты народ. Штогод у гэтым пераконваюцца прадстаўнікі ўсё большай колькасці краін свету, што прымаюць удзел у прадстаўнічым форуме. Таму і словы Прэзідэнта перад першымі акордамі фестывальнай мелодыі яднання, адрасаваныя тысячам гледачоў у Летнім амфітэатры і мільёнам тэлегледачоў у нашай краіне і за яе межамі, былі простымі і, адначасова, важкімі: "Дык няхай жа фестываль адлюстроўвае дух народа: будзе такім жа добрым, адкрытым і шчодрым!".
Менавіта такім і атрымаўся сёлетні фестывальны тыдзень пад віцебскім небам, што нязменна натхняе на творчыя вяршыні і новыя перамогі. Таму і не дзіва, што ў горадзе па-над Заходняй Дзвіной з аднолькавай гасціннасцю, як сказаў наш Лідэр, і любоўю гледачы сустракаюць як прызнаных зорак, так і зусім яшчэ юных выканаўцаў. Доказам таму - апладысменты лаўрэатам міжнародных конкурсу маладых выканаўцаў эстраднай песні і дзіцячага музычнага конкурсу ды гарачая падтрымка віцябчан. "Беларусь ганарыцца тым, што творчая кар'ера многіх вядомых выканаўцаў пачалася менавіта на сцэне Летняга амфітэатра ў Віцебску", - падкрэсліў на сёлетнім фестывалі Аляксандр Лукашэнка.
...Так, як фантастычнае імгненне, праляцелі гэтыя чароўныя сем дзён. І развітаўшыся пад зорным небам з ХІХ "Славянскім базарам...", мы чакаем сустрэчы з ХХ-м, юбілейным, фестывалем, дзе над блакітнавокім горадам залунае чаканае: "Гаворыць і паказвае Віцебск!.."
На здымку: Прэзідэнта Рэспублікі Беларусь Аляксандра Лукашэнку вітаюць госці Летняга амфітэатра.
Фота Андрэя СПРЫНЧАНА