Учора
За Кіраўскім мостам, на правым беразе Заходняй Дзвіны, "Горад майстроў" займеў сталую "прапіску" з 2008 года. Менавіта тут месцяцца былыя Саляныя склады ХVІІІ стагоддзя, якія, па ініцыятыве аддзела культуры Віцебскага гарвыканкама, з 2004 года пачалі рэканструявацца пад Цэнтр народных рамёстваў. Спачатку быў адноўлены адзін з будынкаў - з'явіліся мастацкая галерэя, рамесніцкія майстэрні. Праз некалькі гадоў адрамантавалі яшчэ адзін будынак - узвялі ганчарскі падворак, добраўпарадкавалі тэрыторыю... Цэнтр народных рамёстваў, які назвалі "Задзвінне", пераехаў сюды з прыстасаваных памяшканняў бібліятэкі імя Янкі Купалы, дзе была магчымасць для дзейнасці толькі трох клубных фарміраванняў. Пры ўстанове пачала дзейнічаць кавярня "Задзвінне". Яшчэ адной камерцыйнай структурай Цэнтра стаў салон-крама народных промыслаў "Фэст", што з 2002-га дзейнічае ў гістарычным цэнтры Віцебска, за ратушай, і рэалізоўвае творы народных майстроў з карысцю і для пакупнікоў, і для аўтараў самабытных віцебскіх сувеніраў.
Сёння
У мастацкай галерэі Цэнтра акурат сёння адкрываецца выстаўка Паўлавапасадскай мануфактуры, прысвечаная Дню Саюзнай дзяржавы на ХІХ Міжнародным фестывалі мастацтваў "Славянскі базар у Віцебску". Малая выставачная зала адведзена пад дэманстрацыю керамікі і ласкутнага шыцця Беларусі...
Але не толькі гэтым Цэнтр прываблівае гасцей фестывалю. Дарэчы, у маі, па ініцыятыве старшыні Віцебскага аблвыканкама, Цэнтр стаў называцца "Дзвіна"... дык вось, Гарадскі цэнтр народных рамёстваў і мастацтваў "Дзвіна", па словах Віктара Кібісава, - новы тып установы культуры. Тут працуе каля паўсотні высокакваліфікаваных спецыялістаў, якія займаюцца не толькі культурна-адукацыйнай работай, але і навукова-даследчай, кансультацыйна-метадычнай. Пры Цэнтры дзейнічае 22 клубныя фарміраванні, больш за паўдзесятка якіх маюць звані "народны" і "ўзорны".
Вакол гэтага творчага эпіцэнтра і прарастае штогод "Горад майстроў", які вабіць эксклюзіўнай магчымасцю набыць творы дэкаратыўна-прыкладнога мастацтва "з рук майстра". Да слова, "Фэст" турысты не абмінаюць: калі пазалетась абарот салона-крамы складаў 80 мільёнаў рублёў, дык сёлета ён павялічыцца да 100 мільёнаў...
Фестывальны рамесніцкі кірмаш "Горад рамёстваў" прапаноўвае ў гэтым годзе абласны конкурс майстроў саломкапляцення "Папараць-кветка". Старшыня Беларускага саюза майстроў народнай творчасці Яўген Сахута распавядае "К", што сёлета ў фестывальным фармаце "Дзвіны" пройдзе ўжо шостае такое спаборніцтва, што па маштабе і прадстаўніцтве ўдзельнікаў ператвараецца, фактычна, у па-
дзею рэспубліканскага значэння. Апошні факт цудоўна зразумелі і замежныя фестывальныя госці, якія нязменна выказваюць захапленне брэндавасцю і эксклюзіўнасцю беларускага традыцыйнага мастацтва, што развіваецца сістэмна і няўхільна.
Падобныя конкурсы, па словах Яўгена Сахуты, фінансава падтрымлівае ўпраўленне культуры Віцебскага аблвыканкама. І майстры тут падбіраюцца сапраўды бліскучыя. Сярод саломкапляцельшчыкаў варта вылучыць Адама Краўчука з Віцебска і Тэрэзу Худзякову з Новалукомля, сярод спецыялістаў мастацкага роспісу - Марыю Кулецкую з Пружан і Алену Таляронак з Шаркаўшчыны, сярод ткачых - майстрых Алену Гушча з Гарадоцкага дома рамёстваў і Ганну Рымдзёнак з Шаркаўшчынскага раёна...
Але не толькі народнымі ўмельцамі славіцца адно з найпапулярных месцаў адпачынку ў Віцебску. У "Дзвіне" пастаянна выступае клуб гістарычнай рэканструкцыі і мадэлявання, што прэзентуе побыт, строі і рамёствы славянскіх плямёнаў; кірмашовага настрою дадаюць гарадскія самадзейныя калектывы, якія прадстаўляюць традыцыйныя беларускія музыку, спевы і абрады.
Заўтра
Дырэктар Гарадскога цэнтра народных рамёстваў і мастацтваў "Дзвіна" Віктар Кібісаў упэўнены, што ягоная ўстанова культуры мае вялікую будучыню. Творчая прастора фестывальнага "Горада майстроў" пастаянна пашыраецца. Сёлета, да прыкладу, гарадскія ўлады перадалі "Дзвіне" двухпавярховы будынак колішняй бальніцы, што знаходзіцца праз дарогу ад Цэнтра. Неўзабаве тут з'явяцца дадатковыя рамесніцкія майстэрні, а ў двары будзе зладжаны сад скульптур (яшчэ адна прывабная цікавостка для гараджан і гасцей!).
Па словах Віктара Кібісава, працягваецца рэканструкцыя правабярэжжа Заходняй Дзвіны. У перспектыве тут узвядуць прыстань, уладкуюць спускі да ракі, зробяць усё магчымае для таго, каб гандлёвы шлях "з варагаў у грэкі" быў адлюстраваны як мага больш інтэрактыўна. У выніку тэатралізаваная дзея фестывальнага "Горада майстроў" выйдзе далёка за межы "Дзвіны".