Артысты сярэдняга пакалення, занятыя ў спектаклі, кожны раз з асаблівым задавальненнем разыгрываюць гісторыю пра тое, як у гатэлі сустрэліся чыноўнік, сакратарка і... Зрэшты, сакрэты раскрывае сам спектакль. У ролі Рычарда Уіллі - Валянцін Салаўёў, Пігдэна - Георгій Лойка, сакратаркі Джэйн - Наталля Аладка, дэтэктыва выконвае заслужаны артыст Беларусі Вячаслаў Грушоў.
А 30 чэрвеня адбылася прэм'ера сезона: спектакль "О-ля-ля!", пастаўлены рэжысёрам Юрыем Лізянгевічам па п'есе Марка Камалеці "Вось табе і Ганна!". У галоўных ролях - маладыя артысты: Ніна Обухава, Наталля Саламаха, Андрэй Качан, Павел Давыдоўскі. А Ганну - кемлівую пакаёўку, якая прыкладае шмат намаганняў, каб захаваць сям'ю любімых гаспадароў і самой не застацца "у пралёце", - увасабляе вядучы майстар сцэны Тамара Кабяк. Гэты спектакль завяршае 84-ы тэатральны сезон.
Наперадзе - новыя цікавыя работы: Юрый Лізянгевіч прадставіць спектакль "Вельмі простая гісторыя" Марыі Ладо, Рыд Таліпаў - "Квартэт" Рональда Харвуда, Міхась Краснабаеў адновіць "Ладдзю роспачы", а потым распачне рэпетыцыі спектакля "Ноч на пароме" паводле рамана "Нельга забыць" і вершаў Уладзіміра Караткевіча. Нагадаем, што ў лістападзе 2010 года грамадскасць Рэспублікі Беларусь адзначыць 80-годдзе нашага знакамітага земляка.
Святлана ДАШКЕВІЧ, загадчык літаратурнай часткі НАДТ імя Якуба Коласа
На здымку: сцэна са спектакля.