Рэжысёр тэатра Вячаслаў Корнеў даўно выношваў ідэю ўвасаблення сродкамі тэатра лялек аповесці Уладзіміра Караткевіча "Дзікае паляванне караля Стаха". Варта адзначыць, што пастаноўка твора класіка на сцэне Тэатра лялек у нашай рэспубліцы адбудзецца ўпершыню.
Творчыя задумы рэжысёра спектакля даюць падставы меркаваць, што новы праект будзе цікавы для сучаснага гледача. Гэта пацвярджае і тое, што ў творчай скарбонцы рэжысёра шмат выдатных работ: "Вій" ("народная хлусня з песнямі і пужалкамі"), прымеркаваны да 200-годдзя з дня нараджэння М.Гогаля, камедыя "Паўлінка" ("народныя гульні з лялькамі"), спектакль "Папялушка" ("вясёлая готыка"), які пастаўлены ў вельмі цікавай сучаснай інтэрпрэтацыі па матывах казкі братоў Грым, а таксама іншыя, не менш цікавыя для гледачоў, творы.
Арыгінальныя мастацкія знаходкі імкнецца задзейнічаць у працы над спектаклем "Дзікае паляванне караля Стаха" галоўны мастак тэатра Галіна Ігнацьева. Музычным афармленнем пастаноўкі зоймецца Анжэла Дамахоўская, якая з'яўляецца адначасова і куратарам праекта. Таксама вялікія спадзяванні ўскладзены і на прафесійныя здольнасці акцёраў тэатра, сярод якіх - вядучыя майстры сцэны Н.Бачкарова, Г.Барысава, Н.Суворава, Т.Зэлікава, Г.Лазуціна, уладальнік "Крыштальнага Анёлка" і медаля Францыска Скарыны М.Сцешыц.
Іна ПУДЗЯНКОВА, кіраўнік літаратурнай часткі Магілёўскага абласнога тэатра лялек