Прыезду сусветна знакамітага музыканта і дырыжора Бары Дугласа многія прыхільнікі мастацтва чакаюць з асаблівым піетэтам. У мастацкага кіраўніка філармоніі, бліскучага піяніста і педагога Юрыя Гільдзюка захоўваецца буклет з VIII Міжнароднага конкурсу імя П.Чайкоўскага ў Маскве з заўвагамі “на палях” Ірыны Цвятаевай— адной з заснавальніц сучаснай беларускай фартэпіяннай школы. Насупраць прозвішча Бары Дугласа— сціслая прарочая прыпіска: “Першая прэмія”. Невыпадкова пад кіраўніцтвам Б.Дугласа наш Дзяржаўны акадэмічны сімфанічны аркестр выканае, сярод іншых твораў, Першы канцэрт Ф.Шапэна, саліраваць у якім будзе лаўрэат міжнародных конкурсаў, расійская піяністка Юліяна Аўдзеева.
Сярод іншых выбітных музычных “спатканняў” — джазавыя інтэрпрэтацыі твораў Шапэна ў выкананні польскіх музыкантаў, прэм’еры і ранейшыя творы беларускіх кампазітараў, прысвечаныя Шапэну,праекты ансамбля салістаў “Класік-Авангард”, наўпрост звязаныя з творчасцю сучаснікаў і паслядоўнікаў Шапэна. Шмат будзе гучаць і музыкі Шумана. Некаторыя творы нават будуць паўтарацца, што дасць магчымасць эстэтам параўнаць розныя выканальніцкія версіі.
Паказальна, што грыфам “Мінская вясна-2010” пазначаны далёка не ўсе сакавіцка-красавіцкія канцэрты філармоніі, а толькі, як кажуць, “самыясамыя”. І гэта, мабыць, правільна, бо дапаможа слухачам зарыентавацца ў размаітай філарманічнай афішы, дзе кожны знойдзе сабе штосьці па душы.
Надзея БУНЦЭВІЧ