— Канешне! Жанчыны — захавальніцы сям’і, таму вельмі балюча рэагуюць на нейкія збоі ў дзейнасці ці фельчарска-акушэрскага пункта, ці крамы, ці комплексна-прыёмнага пункта службы быту. Як кажуць, чалавек можа памыліцца, а народ — ніколі, тым больш калі ён прадстаўлены лепшай і больш актыўнай, у сацыяльным плане, паловай. І гэтыя запатрабаванні супрацоўнікі райвыканкама пастаянна ўлічваюць у ходзе кантролю за развіццём сацкультбыту. Кантроль гэты даволі жорсткі і строга перыядычны. У самых аддаленых вёсках бываем: і ў час выездаў інфармацыйна-прапагандысцкіх груп, і ў ходзе штомесячных выязных грамадскіх прыёмаў, і пры правядзенні дзён жывёлаводаў і механізатараў у сельскагаспадарчых кааператывах і на сельскіх сходах. Зрэшты, ва ўсіх гэтых мерапрыемствах пастаянна бяруць удзел і работнікі культуры. Як кажуць, у адной сям’і кожнаму да ўсяго ёсць справа. І не забывайце, што, апрача клубных устаноў, у раёне — 32 дамы сацыяльна-культурных паслуг, таксама чыста жаноцкая вотчына. Тут з вяскоўцамі кантактуюць і ўрачы, і бытавікі, і сабес. Не толькі паслугі аказваюць, але і заўвагі збіраюць. Пасля іх абагульнення — абавязковае рэагаванне райвыканкама. І дробязных пытанняў тут няма, усё выключна важнае: ад удасканалення рэжыму працы аўтакрамы да больш эфектыўнага саюза культурнай сферы на вёсцы з сельгасвытворчасцю. Зрэшты, за “пацёмкінскія вёскі” чырванець не даводзіцца. Сацкультбыт уладкоўваем параллельна з умацаваннем матэрыяльнай базы сельгаскааператываў. У аграгарадках “Новыя Дарогі”, “Паставічы”, “Шчыткавічы”, поруч з рамонтамі культасветустаноў, даводзіліся да ладу мехдвары, фермы, дарогі, ФАПы, лазні, дзіцячыя садкі. Менавіта таму сацыяльна палітычная абстаноўка ў раёне — больш чым спакойная. У выбарчых кампаніях, да прыкладу, прымаюць удзел 94-99 % насельніцтва.
Словам, жанчыны нашы — не толькі зацятыя асветніцы, але і досыць дасведчаныя палітыкі. Сардэчны дзякуй ім за гэтую неабыякавасць.