- Падтрымліваючы жывое выканальніцтва, - кажа дырэктар ФДЮ Алег Мазурын, - мы дбаем пра цяперашніх дзяцей, якія заўтра стануць дарослымі слухачамі філармоніі. Кожная чарговая казка, як і кожны наш канцэрт, - сапраўдны эксклюзіў.
Гэта тым больш адметна, што ўсе стваральнікі казкі - філарманічнага "паходжання". Музыку напісаў кампазітар Уладзімір Саўчык, які працуе ў ФДЮ. Рэжысёрам такога дзіцячага спектакля ўпершыню выступіла знакамітая Ніна Осіпава. А сцэнарый прыдумаў... дырэктар Ансамбля салістаў пад кіраўніцтвам Ігара Іванова і Мінскага струннага квартэта Сяргей Макарэй. Яно і не дзіва, бо за плячыма цяперашняга дырэктара двух камерных калектываў - шматлікія пастаноўчыя перадачы, зробленыя ў свой час у дзіцячай рэдакцыі Беларускага радыё, а таксама сцэнарыі многіх фестывальных і ўрадавых канцэртаў, нават опернае лібрэта.
Казка атрымалася добрай, светлай. Дзеці ўбачылі ў ёй гісторыю пра іншапланецян, якія зайздросцяць зямлянам, таму што тыя святкуюць Новы год. Дарослыя ж маглі задумацца пра тэорыю цыклічнасці гістарычнага развіцця: каляндар іншапланецян пабудаваны на скразной нумарацыі - без падзелу на тыдні, месяцы, гады.
- Галоўнымі "цэнзарамі", - раскрыў сакрэт С.Макарэй, - былі мае дочкі маленькая Маша і - асабліва - 7-гадовая Надзя, якая прыдзірліва вывучала кожны вершык.